車路士自從油王做咗老細後大灑金錢，贏盡所有本土錦標；不過歐聯始終未嚐捧盃滋味！油王、摩連奴，你以為用錢就掂？
咁多年，車路士用喺買球員嘅錢，已經夠起一個新球場；用咁多錢，換來嘅只係英超聯賽冠軍！歐聯聽晚對住華倫西亞，我諗華倫會喺作客情況下，用番最常用嘅戰略──反守為攻。睇返近呢幾場波，華倫絕對高晒，要乜有乜，中前場夠效率，兩翼夠快，連祖亞昆都生猛埋！前鋒韋拿更加fit到漏！
至於車路士雖然係我嘅愛隊，但係我再一次認為佢哋班球員嘅實力，以及合作程度、戰術，係難以同傳統強隊硬拼！車路士嘅最好年代，應該係雲尼亞里執教時淘汰阿仙奴，以及摩連奴淘汰巴塞嗰段時期，𠵱家我覺得真係難有作為，只因為老細太有錢，球員正選地位難以保證、缺乏安全感，咁嘅情況，邊有超水準演出！
另外，其實今屆足協盃8強戲碼都幾好，利華古遜對奧沙辛拿，西維爾對熱刺，呢兩場波，我有信心入球一定開「大」！
周鵬
商業1台《球迷集中贏》主持
電郵：[email protected]