早幾日見到細佬樂祥個日本通朋友Lily，話東瀛政府為咗環保，車價幾貴都要轉用環保車，呢啲政府就真係抵讚啦；但我哋小小一個特區政府，環保車數目隨時10隻手指數完！雖然民用私家車越嚟越多審批成環保車款，用大幅減稅嚟引人買，但講最多廢氣污染嘅，肯定係大大架搵食車，幸好世界各地已陸續將環保系統引伸到大車；繼早前環保拖頭面世後，今日又輪到另一代理商環宇汽車，引入3公升柴油引擎（馬力125匹）跟電馬達（馬力47匹）作驅動嘅三菱CanterEcoHybrid貨車；雖然個Look睇落同傳統柴油貨車差唔多，而總重量亦係常見嘅5噸半，但廢氣排放及耗油量都比原有車款低，唔怕俾人話「墨魚」上身噴黑煙啦！加上波箱係INOMATII嘅5前速+/-半自動款式，兼且仲有埋ABS同駕駛席安全氣袋，咁就算遇到緊急情況都唔使咁驚啦！咦？好似話阿妹娛思個Friend鵬鵬都想換番部慳油搵食車喎，一於約埋佢試吓車先！
查詢：環宇汽車（23955237）
悠穎馳
豪邁不羈，愛車如命，聽幾下引擎聲就知咩車！