時間：97年4月13日
活動：第16屆香港電影金像獎頒獎禮
人物：溫碧霞
經過：溫碧霞由出道至今，衣着打扮始終如一，無論乜嘢天氣、乜嘢場合，都愛作性感打扮。97年4月，溫碧霞應邀出席第16屆香港電影金像獎頒獎禮，着咗件斜肩裝登場，一心諗住做焦點女神，點知出咗事。
扮蟹黐牆行
本來溫碧霞喺場內好風騷咁擺甫士任影，點知俾記者發現佢條白色長裙後邊，近屁股位置有一點血迹，咁鬼搶眼，傳媒紛紛起哄係咁影，個個封晒溫碧霞係「影後」咁，大家都懷疑佢係咪月事來潮，搞到整污糟咗條裙都唔知。
溫碧霞見大家唔影佢個靚膊頭，反而專「影後」，覺得有啲唔妥，結果俾佢發覺自己呢樣瘀嘢，佢惟有將個身黐牆行成隻蟹咁，又攞手袋遮住個patpat位，都咪話唔搞笑。
話晒都叫做經歷過「紅潮風暴」嘅教訓，不過溫碧霞依然故我，好似佢早排出席導演會春茗時，就着咗件黃色低胸吊帶裙，並凸點示人，唔知佢呢次係有心定無意呢？
本欄逢周一至周六刊出
