近排香港富豪第二代甚或第三代紛紛蒲頭，都係為接棒家族生意鋪路，但另一邊，香港有個老牌家族似乎有唔同嘅諗法。噚日，銅鑼灣大地主希慎興業宣布，董事總經理利子厚（MichaelLee）喺下個月8號，股東周年大會之後就唔做。咁重要嘅位，希慎冇諗住喺利氏家族內部搵人接替，而係聘請國際行政人員招聘公司公開請人。
利子厚喺新聞稿話，「我已考慮了一段日子，希望離開公司，追求個人目標，包括參與公職事務，相信現在正是適當的時機，去落實我的理想。」
消息一出，中環班地產分析員同芬佬即刻竊竊私語，有人問MichaelLee同PeterLee（希慎主席利定昌）兩堂兄弟係咪唔咬弦，問勻都冇人答到；但就有人話當年希慎越做越沉，家族中人叫當時做基金經理嘅Michael返去幫手。前幾年，Michael伯父利榮森仲同傳媒講，「公司實際運作，全部由利子厚睇晒。」
呢幾年隨住經濟好轉，希慎租金收入係咁升，Michael功勞好大。有個外資芬佬同華華講：「聽聞MichaelLee有好多大計，可惜發揮唔到。」今年初，利子厚接受傳媒訪問時就講到，要希慎擺脫家族式管理，強化企業管治，今次佢唔做，希慎公開招聘佢個位，算唔算達到Michael嘅理想呢？
[email protected]