晚晚開OT唔得閒返屋企煮飯，仔女冇啖湯水，老公又詐晒型，如果有人上門代煮幾味就最好啦！最近家務助理界中出現4位廚神，個個都有成十幾廿年入廚經驗，搵佢哋幫手，咁就唔使自己操勞，安坐家中就歎到正宗住家菜，點都好過出街食味精啦！
記者：趙珮倩
攝影：伍慶泉
鳴謝：基督教勵行會（家務通熱線：27168770）
（菜式評分，以5粒★為滿分）
創新配搭擺得靚
葉玉鳳
入廚資歷：20年
強項：擅長以創新口味搭配菜式，打破一般住家菜框框，又鍾意裝飾碟餸，色香味俱全，擺到咁鬼靚，唔知仲差啲以為去咗酒店食飯。
賣相：★★★★★
味道：★★★★
翡翠明珠
需時：15分鐘
價錢：$25/3人
材料：西蘭花1個、鮮蝦1/2斤、鹽/麻油各1/2茶匙、胡椒粉少許、雞蛋白1隻、鹹蛋1隻
做法：先將蝦剁碎，下鹽/麻油/胡椒粉/雞蛋白，用筷子順一方向攪成蝦膠備用；西蘭花烚熟過冷河，釀入蝦膠，上面放上少許鹹蛋黃，蒸6至7分鐘；燒熱1湯匙水，加入鹹蛋白/胡椒粉/麻油煮成薄芡，淋上西蘭花即可。
貼士：蝦肉攪至起膠之後，用力撻一撻，可令它更彈牙。
辣椒芒果魚球
需時：15分鐘
價錢：$35/4人
材料：龍脷柳1斤、辣椒仔汁2茶匙、花奶2湯匙、芒果1/2個、芒果汁1/2杯、鹽/胡椒粉/麻油各少許、蛋黃1隻、生粉適量
做法：龍脷柳以鹽/胡椒粉/麻油/蛋黃略醃，撲生粉炸至金黃；燒熱鑊，下芒果汁煮滾，加入辣椒仔汁/芒果肉/花奶/鹽，魚柳回鑊，煮至汁稠即可上碟。
試食兵團：
基督教勵行會總幹事張太：芒果魚球味道幾特別，唔似芒果味，好得意。
細細個入廚
盧鳳文
入廚資歷：18年
強項：細細個就識入廚房幫媽咪煮嘢，住家菜口味傳統，最拿手炒菜蒸魚，親戚朋友試過佢手勢都讚口不絕。
賣相：★★★★
味道：★★★★
銀芽辣肉丁
需時：15分鐘
價錢：$20/4人
材料：碎豬肉1/2斤、冬菇8至10隻切粒、芽菜4両、鹽/糖各適量、蠔油3茶匙、蒜茸豆瓣醬2茶匙、生粉少許
做法：芽菜汆水後上碟；豬肉以鹽/糖略醃後炒熟，下冬菇炒勻，加入蠔油/蒜茸豆瓣醬和1/2杯水，煮大約5分鐘，以生粉埋芡，淋上芽菜即可。
田園炒雞柳
需時：15分鐘
價錢：$20/4人
材料：雞髀肉1件、西蘭花1個、小椰菜1/2個、粟米仔/草菇各1/3杯、鹽/糖/雞粉各1/2茶匙、豉油/豆粉/蠔油各1茶匙、麻油/生粉各少許
做法：雞肉以鹽/糖/豉油/豆粉/麻油略醃；所有蔬菜汆水過冷河。肉炒至8成熟蔬菜回鑊，蠔油/雞粉/生粉埋芡。
試食兵團：
曾先生：最鍾意呢碟銀芽辣肉，芽菜好爽口，辣肉好惹味。
擅煮即日鮮
周麗娟
入廚資歷：20年
強項：最叻喺街市揀即日鮮，靈感無限，邊樣新鮮煮邊樣，煎炒煮炸煲湯瓣瓣掂。
賣相：★★★★
味道：★★★★1/2
花雕糖醋排骨
需時：30分鐘
價錢：$20/4人
材料：排骨11/2磅、蒜頭2粒、薑3片、鎮江醋3湯匙、豉油/糖各2湯匙、花雕1湯匙
做法：排骨汆水瀝亁；爆香薑/蒜，下排骨炒香，下鎮江醋/豉油/糖/花雕/200毫升水，慢火燜至收亁。
韭菜花炒鮮魷筒
需時：15分鐘
價錢：$15/4人
材料：韭菜花1束、魷筒仔1斤、辣椒/生粉各少許、蒜頭1粒、雞粉1/2茶匙、蠔油1湯匙
做法：先將魷筒仔汆水瀝亁備用；燒熱少許油，下韭菜花炒熟盛起；爆香蒜/辣椒，魷筒仔回鑊炒香，下蠔油/雞粉/生粉，加入2湯匙水埋芡即成。
試食兵團：
李先生：鮮魷筒好軟腍，咬落去仲好多汁，好有鮮味。
向大廚老公偷師
陳淑芳
入廚資歷：16年
強項：老公做大廚，成日可以偷師，自誇煮樣樣都拿手。
賣相：★★★★1/2
味道：★★★★★
踏雪尋鱔
需時：15分鐘（不計浸雪菜時間）
價錢：$40/4人
材料：雪菜2湯匙、薑5片、草菇８粒、西芹粒1/2杯、西蘭花1個、蒜頭3粒、鱔1條、鹽/糖/胡椒粉/生粉/生油各適量、蠔油1/2湯匙
做法：雪菜浸1小時；草菇/西蘭花汆水；鱔魚起雙飛，以鹽/糖/胡椒粉/生粉/生油略醃。爆香薑/蒜，炒熟鱔片；再爆香薑/蒜，下雪菜/西芹炒熟，草菇/鱔片回鑊，下鹽/糖/蠔油兜勻，西蘭花伴碟。
秘製雞中翼
需時：40分鐘
價錢：$40/4人
材料：雞中翼16隻、香葉/八角/桂皮各1份、生抽500毫升、老抽125毫升、玫瑰露酒1/2杯、冰糖1湯匙
做法：雞翼洗淨瀝亁備用；生抽/老抽/香葉/八角/桂皮加入3飯碗水，以慢火煮30分鐘，然後再加入玫瑰露酒/冰糖，待滾起後，放入雞翼以慢火煮10分鐘即可。
貼士：冰糖可煮出甜味，亦可令肉質變得軟腍。
試食兵團：
許先生：雖然賣相沉實，但鱔的鮮味好突出，超爽口彈牙。
互笠高帽
4位家務助理個個廚藝高強，仲識英雄重英雄，對對手嘅菜式有讚無彈，十分欣賞；不如又等佢哋自己選出心目中至正嘅住家菜吖。
陳淑芳：「我最鍾意鎮江骨，簡單易整又好味。」
周麗娟：「我鍾意食辣啲，所以覺得銀芽辣肉好正，返屋企都會試吓煮。」
葉玉鳳：「銀芽辣肉好惹味，送飯一流，煮法又簡單快捷。」
盧鳳文：「芒果魚柳啲味好特別，同埋好欣賞佢啲裝飾擺得咁靚，真係要學吓嘢。」
結果盧鳳文嘅銀芽辣肉丁得兩票勝出！