由吳宇森執導嘅大製作《赤壁》，就嚟喺北京開拍，劇組近日正密鑼緊鼓趕搭布景，扮演小喬嘅林志玲為咗拍好呢套處女作，𠵱家已經去咗北京受訓。
張震秘密練功
曾多次傳出俾人飛起冇得扮孫權嘅張震，雖然仲喺台灣，但原來佢正秘密練功夫同馬術，而代替梁朝偉演諸葛亮嘅金城武已經試咗造型。
片中幾個主要嘅場景，好似孫權嘅宮殿同小喬屋企會喺北京電影學院度搭，而劉備嘅宮殿就係改建涿州影視基地嘅東大殿，至於曹操嘅營寨就喺河北省西鼓縣村嘅水庫湖邊，劇組仲填平部份嘅湖嚟搭停泊戰船嘅港灣，呢啲咁宏偉嘅布景，估計花費過千萬人民幣。
另外，《赤壁》嘅重頭戲「草船借箭」、「火燒連環船」嘅場景就搭喺河北省易縣安格庄水庫，劇組已喺湖邊做咗兩艘戰船，為咗儲水拍戲，水庫閘門都閂埋咗好耐。
城外堆滿馬屎
除咗水戰重頭戲之外，仲會喺易縣影視城外嘅斜坡拍馬戰戲，劇組喺城門外堆起許多土堆，上面仲有好多熱辣辣嘅馬屎，睇嚟趙雲會喺呢度七進七出救阿斗；至於張飛喝退曹軍呢段戲，就會喺張飛嘅故鄉涿州拍，格外有意義。
