明星嘅童年照向來係網上流傳嘅熱門話題，最近香港討論區就有個「日本明星可愛的小時候」嘅討論，版主MizMiz真係好鬼勤力，搵咗過百張日本紅星暗星嘅童年照同大家分享。宇多田光、濱崎步、竹內結子、錦戶亮、KinKiKids等全部落齊。
雖然阿Net以前見過失婚歌姬宇多田光嘅童年照N咁多次，但係睇到呢張娘炳樣加條粗眉相，依然笑到噴飯。眾多日星童年照中，阿Net最認同網友Klose嘅意見，都係覺得「竹內結子細個嗰時好得意啊！」至於青春女星長澤正美童年同𠵱家都係經常笑容滿面，而且五官變化唔大，阿Net敢拍心口話長澤唔係人工美少女。
錦戶亮未瞓醒
男星錦戶亮喺日劇《一公升眼淚》就好情深兼好學，不過當我睇到佢張睡眼惺忪嘅初中學生相，真係扣咗唔少分。相反，今時今日經常扮鬼扮馬嘅KinKiKids（特別係堂本剛），童年時較為討好，嫩口又可愛，相信米高積遜（MichaelJackson）都會認同。其餘有啲日星童年照如果唔寫佢係邊個，真係認都認唔出。
日本明星童年討論區：
http://www1.discuss.com.hk/viewthread.php?tid=3546975&extra=page%3D2