因郭羨妮介入而導致與太太黃慧寶離婚的陶大宇，近日不單止備受離婚及緋聞困擾，昨日他與蘇玉華拍攝新劇《和味濃情》一場落水時，更被發現43歲的他，三千煩惱絲變得越來越稀疏，露出地中海和M字額，莫非他因離婚煩惱導致嚴重甩髮？
陶大宇承認和前妻黃慧寶離婚後頓成新聞人物，上周他拍攝新劇《和味濃情》不時發𤷪𤺧兼頻頻NG；至於被指為第三者的郭羨妮，前日出席公開活動被問到發情慾短訊給大宇一事時，居然標汗感不適。雖然這對緋聞男女各自一身蟻，但昨日拍攝落水戲的大宇，卻表示拖郭羨妮落水感歉意。
「盡量放膽推我啦」
昨日中午約12時，大宇在鯉景灣碼頭拍攝《和》劇一場墮海戲，劇情指他接獲蘇玉華電話後趕到碼頭，豈料對方二話不說，猛力推他心口，令他失足墮海。現場所見，大宇心情已平復，對稿後即開始背對白兼睇位跳海，更對蘇玉華說：「你盡量放膽推我啦！」表現十分認真。
然而大宇拍完濕身戲上岸時，M字額和地中海原形畢露，叫人慘不忍睹，莫非大宇因為近日離婚事件想得太多，導致三千煩惱絲越來越少？
此外，昨日天氣驟變，烏雲密布兼轉冷，幸好大宇落水鏡頭拍攝順利，毋須再落水。拍完後，他連隨攬着水泡游上岸，全身濕透的他即披毛巾及看錄影帶，豈料此時竟下傾盆大雨。其後大宇駕車隨攝製隊到筲箕灣一燒味店吃午飯，再返海怡半島寓所休息，晚上則到電視城續拍廠景。
對於郭羨妮前日標汗不適，昨日大宇揚言感歉意，他接受記者電話訪問時說：「我唔喺現場，都唔知乜事，但如果當時情況真係你哋所講咁，可能因為呢件事令到佢會唔舒服同有壓力，其實我都好抱歉，牽連埋佢受影響，始終離婚只係我自己嘅家事。」
「唔會刻意打畀佢」
問大宇會否再次致電郭羨妮道歉？他說：「之前我已經向佢道歉咗，唔會刻意再打畀佢，適合嘅時間至同佢講啦。」提到昨日冒冷跳海，大宇說：「落水好凍呀，但公司安排好好，用兩部攝影機拍，一take過搞掂，一拍完即刻落好大雨，好彩順利拍晒。」
採訪、攝影：娛樂突發組
