中國風越吹越熱，原本只做時裝代理嘅寶利福，都同珠寶設計師、蔣怡男友翁狄森（DicksonYew）搞間合營公司，主要以LOC（LifeofCircle）呢個品牌設計同分銷，用中國哲學為主題嘅飾物同擺設，其中「囍」同「吉」系列，更係LOC鎮店之寶，長賣長有。
Dickson早於2000年設立LOC，今年2月，就同寶利福合作，佢負責設計，對方管理同分銷。做開高級珠寶設計嘅Dickson話，希望將「囍」、「如意吉祥」、「陰陽」等中國概念，注入設計中，加上LOC主攻大眾市場，飾物價錢介乎一千至兩萬五，普羅大眾都負擔得起，可以令更多人體會中國文化。
寶利福行政總裁吳珊寶話，𠵱家LOC喺台灣、英國、日本等地設有銷售點，但專門店就得香港有，希望今年喺中環同銅鑼灣開多兩間，出年就喺台灣開3間，每間投資額約100萬左右，預期一兩年內有回報。