有謂人不風流枉少年，99%的男人都自命風流，但一個唔小心，風流變下流，點解變下流？就係因為衰「孤寒」！好似賣衫賣到上市嘅「頭髮濃密」咁，最近俾班女權分子響「老蘭」一帶，爆佢嘅婚前風流賬，用以警惕其他姊妹咪上當，而佢最大嘅罪狀，就係滾得寒酸。
話說佢雖然個樣唔係好得，但讀書嗰陣，已經憑住一把「朗」過蜜糖嘅口，搞掂校花之餘，仲食過界，踩到隔籬學校，媾女成功率99%。後來將間公司上市，發咗達，就落本加多招，每日99朵紅玫瑰，啲女想唔死都幾難。婚前佢亦都好似好多有錢佬咁，嚟一招金屋藏嬌，但問題係，佢竟然將兩件「戰利品」放埋同一屋簷下。
女權分子話，佢老死就係咁衰咗響「頭髮濃密」手上，於是就執埋行李進駐金屋，點知開門後，發現裏面早有另一「嬌」坐鎮，嗰一刻梗唔高興啦，但三言兩語，就俾「頭髮濃密」講掂，兩姝就係咁河水不犯井水，一人一邊，咁「頭髮濃密」又唔係話變態要玩「三人行」，只係每次上去，鍾意邊個就去邊間房。
半價折扣卡當分手費
金屋裏面啲「嬌」，到咁上下就會換，以「頭髮濃密」有頭有面，玩車又唔貴唔玩，大家諗，佢掟女點都會賠足，點知分手費只係一張終生買衫半價嘅折扣卡，真係該煨。女權分子話，「頭髮濃密」至少都應該畀啲舊菜終生去佢度免費拎衫，如果真係驚啲舊菜亂拎蝕水，最多咪set個quota。半價，求其問佢啲高層借個staffoffer、季頭季尾減價都唔只啦。
「頭髮濃密」以後唔想再俾人唱，真係要諗諗畀個大啲嘅discount人哋囉。
[email protected]