網上世界真係乜都可以發生，好似近年有唔少網民好鍾意惡搞，將原原本本有美貌有身材嘅型男索女大明星，變成又老又殘、身材走樣嘅公公婆婆，阿Net近排喺網上發現茱莉亞羅拔絲（JuliaRoberts）、籮霸珍妮花洛庇絲（JenniferLopez）同畢彼特（BradPitt）都不能倖免！
茱姐多皺紋
阿Net最近去過內地嘅狗仔網（ http://bbs.gouzai.cn），有網民好得閒咁大玩惡搞，將啲中外明星變老，擺明同佢哋唔妥啦！好似原本身材突出嘅籮霸珍妮花洛庇絲，俾網友整到成個大肥婆咁，個招牌巨籮足足大咗一倍！不過話時話，阿Net雖然對籮霸呢類麻麻煩扮大牌嘅Diva冇好感，但係見佢個樣變肥咗，又覺得佢好可愛喎！
茱姐茱莉亞羅拔絲比起籮霸仲慘，做咗阿媽之後更加瘦骨嶙峋嘅佢，唔單止俾人變成大肥婆，仲有人喺佢嘅closeup大頭照上面加多幾千條皺紋，即時變咗老婆婆。不過茱姐咁有米，到佢老嗰陣使少少錢去整容，一定唔會變到咁皺啦。反而畢彼特就要小心啲啦，佢近年已經被指樣殘，佢最好係睇睇狗仔網張惡搞相自我警惕吓，及時護理好啲皮膚。
超人着絲襪
另外，《超人——強戰回歸》（SupermanReturns）入面嘅班頓羅夫（BrandonRouth）亦不能倖免，被惡搞網友變成着HelloKitty粉紅緊身衣、短裙同吊帶絲襪，認真惡頂。
網址： http://bbs.gouzai.cn/thread-35.html
版主：阿Net
本欄逢周一至六刊出