出國旅遊，去到人生路不熟嘅地方，又溝通唔到，點算？「最多大膽啲，全程用手語，我死唔信冇人會明白！」如果你睇過《巴別塔》，或者你亦感受到人與人之間溝通唔到嘅阻礙，電影所講唔只局限於語言上，更關乎人與人之間嘅疏離！主角畢比特正成為故事中嘅犧牲品：老婆中槍失救、仔女被當成偷渡小人蛇，自己亦同樣受到同伴排斥……導演好絕情，係要畢仔家破人亡至滿足，點解咁慘？睇過隻DVD你咪知囉！
記者：陳國輝
故事簡介
所謂「巴別塔」，乃出自《聖經．創世紀》內容，原意指人類本來共用同一種語言、住同一個地方，後來人類決定建築一座通天塔，向上天展示力量，人類嘅驕傲激怒咗上帝，自此人類各持不同語言，流徙到不同地方居住。
一個牽連摩洛哥、墨西哥及日本三地嘅故事。一粒子彈，引發連場政治風暴︰住喺摩洛哥嘅小兄弟因為一次槍擊，連累全家被視為恐怖分子，翻起長期隱藏於美國及阿拉伯文化之間嘅緊張關係；喺墨西哥邊境，司機被懷疑偷運小人蛇，繼而引發逃亡沙漠之旅；地球嘅另一端，日本人聾啞女兒惠子，又因長期缺乏父愛，企圖以身體去換取他人嘅愛……
一次誤會 慘過誅九族
類似《巴別塔》以人性為題材嘅電影，可謂買少見少；並非呢類主題唔再吸引，而係想做到好Touching、睇到觀眾鼻紅紅、眼濕濕咁離場，真係一啲都唔易。導演艾力謝路巧妙利用人與人之間嘅誤會，製造好多唔同嘅衝突，事件由一對小兄弟嘅磨擦，升級為國與國之間嘅政治風波，你都咪話唔誇張！但聽古者咪駁古，劇情都算合情合理，完全唔覺得牽強，最重要佢俾你體會到人與人真係可以好冷漠，你死你事。例如兩個摩洛哥小兄弟可以為咗啖氣，拎住支真槍亂向人發射；身邊一班旅行團團友，會因為你老婆受傷，為免拖延咗返國時間，最後將你哋遺棄；更慘嘅Case係，當你身處異地向自己國家求助時，政府竟然利用你作為政治工具，向別國提出苛刻嘅條件，從中獲益……
故事嘅最終勝利者，屬於強權、充滿野心嘅政府；人民，只不過係一件工具，《巴別塔》筆下嘅受害者，唔單只係畢比特一家，更牽連至整個摩洛哥人民，變成國與國嘅政治紛爭，一旦打仗，便達到強權國家嘅目的。
臨記超班唔使睇YouTube
電影劇情固然重要，但也不可忽略演員嘅內心戲部份。男女主角畢比特以及姬蒂白蘭芝，都貴為國際級巨星，演技點好法，點樣賣命唔使深究；反而值得一提嘅係，電影入面嘅角色，例如摩洛哥小鎮裏面嘅小兄弟、年輕繙譯員，以及日本聾啞女子學校嘅學生、墨西哥邊境小村莊嘅居民等……原來全部係當地臨記，佢哋冇經驗，從未拍過電影，對要求高到嘔嘅艾力謝路嚟講，佢覺得呢啲先係超班演員：「其實佢哋唔係拍緊戲，只不過做番自己，要演繹自己本來嘅身份，比任何人都更易掌握。」心諗，𠵱家YouTube每日成千上萬人發明星夢，自導自演短片擺上網任人Click，毫無質素，只期待被發掘嘅一天；聽完導演教路，大家知道點提升演技未呀？
搏命製作 未獲批文照拍
雙碟版入面有一隻BonusTrack，與一般睇慣嘅Makingof唔同，佢甚少幕後製作花絮，亦唔會出現以往嘅CG製作過程，皆因裏面只有一條長達80分鐘嘅片段，冇分段播放，要一氣呵成睇晒成套電影，跟住再直煲落去，總共223分鐘，就算套戲真係好吸引，亦未必夠精神頂得住，個人建議不如分開兩次睇。BonusTrack主要描寫導演嘅拍攝進程，你唔清楚佢為人，最好留意吓，原來艾力謝路係個性情中人，一時間會無聊地當碌柱係鼓，一邊拍一邊跳舞；另外又發現，《巴別塔》喺東京拍攝嗰陣，原來未獲得當地政府批准，導演為夾硬完成呢節劇情，點都話「拍咗先算」。嘩，有咩事邊個負責先？雖然過咗火位，但見佢哋拍攝咁認真，值得睇完再睇嘅！
PROFILE
《巴別塔》雙碟特別版
片長：143分鐘
級別：IIB
區碼：3
售價：$109（DVD）$59（VCD）
