歐聯8強首回合，本周中殺到埋身，到季尾，列強已經冇邊隊仲可以人腳齊齊整整，或者無憂無慮咁準備呢個大賽。邊隊想成為首回合贏家，就要分別先解決傷兵、停賽、排陣或者缺態等難題。文：藍鑽石
排陣 紅軍高治忽然當勇
利物浦啱啱喺聯賽大炒阿仙奴，乜仇都報晒，仲有咩好愁？有！領隊賓尼廸斯要為排陣而頭痕。話說古積特搭比拿美，本來係歐聯嘅雙箭頭鐵膽，但高治前日對阿仙奴失驚無神連中三元，忽然當勇。再講，高治曾經喺今屆分組賽轟破燕豪芬大門，唔用，又真係好似幾嘥料。
燕豪芬啱啱喺聯賽靠法芬中後段入波，至作客迫和NAC，話冇留力就假嘅。隊波最大隱憂始終都係後防大將阿歷士洛里高長唞，防線穩定性始終差啲啲。
今輪焦點大戰：燕豪芬vs利物浦
開賽時間：香港時間周三（04/04）2:45am
直播：now684台
傷兵 紅魔冇埋尼曼查維廸
曼聯前日反勝布力般流浪，連賽前話有傷嘅大紅人基斯坦奴朗拿度都踢足全場咁滯。不過，曼聯贏波代價唔小，中堅尼曼查維廸因肩傷退下火線，賽後證實要唞5個禮拜，連埋養傷嘅「加利仔」，禮拜三作客羅馬就冇咗兩個後防中流砥柱。
羅馬亦唔見得比曼聯好，32歲先第1次被選入意大利國家隊嘅「老狼」東尼圖，因為腿肌有傷，8強兩個回合都唔使預佢。好在早排爆鼻嘅捷禾已經復出，禮拜三應該會繼續戴保護罩，以蝙蝠俠look撐場。
今輪焦點大戰：羅馬vs曼聯
開賽時間：香港時間周四（05/04）2:45am
直播：now684台
缺態 車仔主將突轉沉
睇過前日車路士對屈福特成場老鼠拉龜，車仔躉係咪好掛住洛賓呢？查實車路士眼前核心問題係主將冇態，杜奧巴3月份食白果，林柏特近況亦唔好。
華倫西亞射手摩連廸斯養傷，仲有個大勇嘅韋拿，睇佢前日對愛斯賓奴拍維辛廸如魚得水，踢到曉飛，睇嚟車仔想斟佢加盟嘅消息，未必係吹水。
今輪焦點大戰：車路士vs華倫西亞
開賽時間：香港時間周四（05/04）2:45am
直播：now685台
停賽 拜仁乏兵源鬥剋星
8強之中，以拜仁慕尼黑最受停賽問題困擾，除咗冇正選龍門簡尼，亦冇埋中場雲邦美。
拜仁禮拜二會同老對手AC米蘭交手，計往績近年幾乎輸晒。AC前日迫和羅馬，睇見尼斯達復出即刻上力，有幾腳包抄得好準，有佢壓陣，就算馬甸尼趕唔切復出都冇所謂啦。
今輪焦點大戰：AC米蘭vs拜仁慕尼黑
開賽時間：香港時間周三（04/04）2:45am
直播：now685台