丹楓（271）呢幾年有波幅冇升幅，但揸住嘅資產，件件「框框」聲，丹楓遲早「嘭嘭」聲。丹楓連紅山半島、尖嘴港晶中心，及油塘、香港仔工貿等物業組合，樓面高達68萬平方呎，件件筍嘢。集團未重秤前NAV1.63元，現價（0.65元）折讓，已經有60%。齋秤紅山半島物業，去到市價水位，丹楓NAV已經值兩蚊，折讓講緊67%，吸引到爆。
又丹楓揸住物業權益，33%至50%不等，並唔係控制性權益。但呢批物業特別係工貿樓，一經重建，價值浮面。估有買家有興趣，又或者丹楓同對家齊齊重建，一啲唔出奇，丹楓絕對有資產重組概念。呢期市場狂炒落後折讓股渝港（613），一個星期升1倍，世城（355）一有新業務動作，上星期3個交易日，最高升84%。丹楓呢隻落後股，炒NAV又得，炒資產重組亦得。就以渝港升幅做目標，丹楓現價翻一番到1.3元，仲有大把NAV折讓墊底。
亨泰抵買短炒一轉
亨泰（197）07年度中期（12月止）純利增長41%到7358萬銀，就當全年度純利增幅，只係維持呢個水位，亨泰純利已經可以上到1.7億銀，連埋上年供股攤薄效應計，PE企番12倍。以同樣係主打祖國嘅各類內銷股，尤其係食品股，預期PE閒閒哋上到20、30倍，亨泰現價（1.44元）相對上仲係吸引。呢轉短打，以亨泰15倍PE做目標，股價要見1.8元，潛在回報率25%，又係有魚有肉。