張學友前晚在廣州開騷，勁歌熱舞一番，又讓女dancer坐大髀跳辣身舞，場面惹火。學友表示05年細女出世令他十分興奮，因證明他仍有心有力，但問到他可會再生時，他堅定地說：「唔打算生，生唔難，養就難。」
張學友的「張學友好久不見中國巡迴演唱會」前晚在廣州天河體育場舉行，當他唱完《餓狼傳說》後即笑道：「唔係講笑，我一把年紀，唔知可以撐到幾多場，不過每次我都會出盡力。」
攬女香艷勁舞
學友指04年推出的《Lifeislikeadream》大碟內歌曲是自己創作，當中收錄的《搖搖》送給大女、《講你知》送給太太羅美薇、《給朋友》則是送給他一班已離開的朋友，由於昨日是張國榮逝世四周年，學友遂把這首歌送給他。
學友說：「05年生咗第二個女，對我嚟講係非常興奮，嘻嘻，原來我仲得㗎。個細女雖然冇叫我寫歌，但啱啱有首歌《在你身邊》，好似好期待細女出世，所以暫時送呢首歌畀細女。」其後學友換上紅色衫坐在大班椅上與女dancer勁歌熱舞，而女dancer則坐在學友大腿，場面香艷。他獻唱《忘記她》時一度掉下headset，要蹲低拾起。
演唱會安哥了六、七首歌後，於晚上11時許結束，學友在下榻酒店開香檳慶功，對於跌咪意外，學友說：「兩三個鐘咁多郁動，梗有錯漏，自己都好滿意，畀80、90分。」記者指他與女dancer跳舞十分性感，他笑道：「我着到咁密實，都唔sexy，但耐力驚人，原本之前馬來西亞室內地方開演唱會，草蜢跳到暈咗，但我就冇事。」
恐無暇伴女兒
演唱會中學友大讚自己「仲得」，未知他可會再追多個？他即耍手擰頭說：「唔會！我唔打算生，生唔難，養就難，我怕自己唔夠時間陪佢哋，遲啲我都會作番首歌畀細女，要公平啲。」
採訪、攝影：曾小嘉
