中國人迷信係人都知，特別係做生意嘅人好講意頭，所以佢哋好鍾意個「8」字，寓意「發」。呢種偏愛「8」字嘅情意結，原來亦可以喺內地嘅股票買賣中發現到。
大陸莊家逢8到價
內地博客蔡猶斌就發現咗個有趣嘅現象，大陸股市嘅莊家喺操控股價時都好講意頭，偏愛「8」字，所以當個股價出現「8」，可能暗示當日嘅股價已到咗最高或最低位。佢舉咗個例子，如稀土高科（600111），3月1日嘅股價自開盤後不斷咁向上升，但當打出16.18元後，就到咗當日最高價位；之後幾個交易日都同樣出現咁嘅情況，2號、5號同7號最高價分別報15.88、15.98同16.08元。
究竟呢個情況係咪巧合呢？博客就認為唔係，佢解釋喺7號嗰日，稀土高科嘅股價喺開市10分鐘就已經升到16.08元，之後就停咗仲跌返落去；但當日大市其實係咁升，只有稀土高科嘅股價不為所動，無突破，可以想像莊家以「8」字作為當日最高價位。又例如中石化（600028），3月6日嘅最低位係8.38元。你信唔信真係咁巧合吖？
香港嘅莊家有冇咁大嘅本事，咁樣操控股價就不得而知，不過，內地來港上市嘅公司，揀上市編號時都好喜歡有個「8」字，特別係中資金融股，好以中行（3988）、中銀香港（2388）、工行（1398）、交行（3328）及招行（3968）等。
中資金融股偏愛8
可惜嘅係，有個「8」字嘅股票，並唔係代表股價硬淨，好以叫「實發生發」嘅中國地產（1838），一上市就潛水，未蒲過上水面，至今較招股價（3.6元）仍跌13%。