以前去紅磡黃埔搵食，多數幫襯詠藜園或鳳城，食得多都會厭。新城DJ阿貓同思敏在黃埔返工，日日都要在附近食飯，幾乎早午晚3餐都是在黃埔解決。一對拍檔辣味相投，專搵辣菜食，佢哋大力推介民泰街嘅辣菜，款式多辣味濃，實行挑戰大家的舌頭！
記者：梁學文 攝影：譚盈傑
泰豐
菠蘿焗雞正宗甜酸
短短的一條民泰街集結了20幾家食肆，滬菜、泰菜、川菜、茶記、甜品……種類之多，真係10隻手指都數唔晒！要數阿貓同思敏嘅最愛，首推泰國菜館－泰豐。泰豐由泰國人黃小姐主理，由細舖搬大舖，黃小姐話：「我16年前嚟香港，中文字都唔識多隻，於是喺後巷整泰菜，一路做到𠵱家。成班師傅都係由開檔做到𠵱家，一齊開檔一齊住一齊食，好似一家人咁。」
泰豐的菜式全部依照泰國正宗做法，「師傅們唔識煮中菜，淨係識煮泰菜，想唔專都幾難。正宗泰菜嘅甜酸辣一定跟到足，唔會搞花臣。不過會聽客人意見，以前煮魚會成日揭蓋睇火，客人就話咁煮法，魚會唔好食，教我哋唔好揭蓋。」另外，開舖到𠵱家從來未換過師傅，所以可保持高水準。
泰式菠蘿焗雞$50
用新鮮菠蘿焗雞，一上枱就有好香鮮果味。雞肉用泰式香料醃過再焗，入口有些少辣，不過菠蘿的甜味，又可以中和辣味的嗆喉感覺。
青咖喱雞$45
食正宗泰式青咖喱一定要配雞，而咖喱香而少辣，而且加了檸檬葉，多了種清香。
辣子胡椒炒軟殼蟹$70（上）
酸辣芒果絲軟殼蟹$70（下）
青芒果絲酸酸甜甜引起胃口，再吃一口軟殼蟹，香脆可口亦不失蟹的鮮味。愛吃辣的話，吃辣子胡椒炒蟹就最啱。
泰式酸辣明爐蒸魚$120
用本地烏頭做蒸魚，魚的鮮味夠，唔會有國產貨的泥味。值得一試的是個汁，酸辣清香，送飯最好。
呢度嘅咖喱雞好香好滑。
泰豐（23343271）
地址：民泰街43號地下C1舖
營業時間：12nn-3pm、6pm-11pm
老上海
少辣怪味雞 食落唔怪
李師傅和陳師傅都是由灣仔豫園請過來，有幾十年煮滬菜經驗，由他們主理的上海菜，質素絕對有保證。這裏不會有新花臣菜式，只專心煮正宗上海菜。不可不提的是這裏的包點即叫即做，唔會預先做定，難怪小籠包可以日賣過千隻。思敏話來食午飯最抵，因為客飯20幾蚊有交易，有湯又有餸，份量仲好足夠！如果嗜辣的話，思敏還推介酸辣湯，她說：「呢度個酸辣湯嘅酸味適中，辣味亦相當足夠。」
怪味雞$48
先用上湯將雞浸熟，令雞肉入味。而怪味醬係用花椒、豆瓣醬、麻油等材料做成，聞落有陣怪味，食落幾特別。
亁燒明蝦球$98
招牌菜式亁燒明蝦球，入口甜甜酸酸，仲有一陣茄汁味。原來師傅加咗些少茄汁煮，更能引出蝦肉的味道。中蝦開了邊，入口都幾爽。
小籠包$38/10隻
日賣過千隻嘅小籠包，皮薄餡靚就講唔上，不過勝在即叫即做，新鮮熱騰騰。味道方面唔錯，湯汁可以多一點就更好。
老上海（23656969）
地址：民泰街8-10號地下
營業時間：11am-1am
景霖
麻辣湯底夠嗆喉
雖然門口唔太起眼，不過經過一定會注意到，皆因店內長期煮麻辣，其香味四溢，經過實聞到。麻辣湯底是景霖的招牌貨，唔理配咩材料都一樣咁出色。夠膽的話，大可以叫個勁辣湯底挑戰自己，血紅湯底輕啜一口，肯定令你投降。就連3歲開始食辣的阿貓都投降：「個辣湯入口好香，未飲落口齋聞經已好吸引。入口真係好辣，就咁飲都ok，如果用來做米線湯底，我肯定投降。」
海鮮過橋米線$36
淨係知道有鮑魚片同帶子，呢個$36的海鮮過橋米線經已值回票價。海鮮唔係同個湯一齊煮，所以味道有點失色。
重量級過橋米線$33
大大碗過橋米線有齊牛肉、豬肉、腩肉、雞肉等12種材料，份量足夠2個人食。無論清湯或麻辣湯都要加酸菜，味道會更上一層。
四川烤雞翼$18/6隻
烤雞翼有四川麻辣味同新疆香草味，我會揀四川麻辣雞翼因夠香口。所有雞翼都係即叫即烤，保證新鮮做，入口脆卜卜。
景霖四川麻辣米線（27656855）
地址：民泰街17-27號家華樓地下6A
營業時間：11am-11pm
芝麻綠豆
明星甜品店
1碗芝麻蛋白燉奶，令芝麻綠豆聞名民泰街，引來不少明星幫襯，亦係阿貓同思敏的解辣推介。平時食完辣菜，佢哋都鍾意食呢度嘅甜品，唔飲奶的阿貓就食涼粉，而思敏愛食燉奶。另外，仲有其他自創甜品，同樣出色吸引。
櫻桃小丸子$22
用士多啤梨做沙冰，配湯圓凍食，感覺特別，難怪可以成為鎮店之寶。
香蕉奇異果黑珍珠$27
據稱黑珍珠有美容減肥功效，香蕉奇異果配黑珍珠，入口香甜，黑珍珠又有𡁻口。
合桃蛋白燉奶$17
合桃燉奶面頭是燉奶，內裏是合桃露，入口幼滑，最好每樣先食一啖再攪勻，至可以食勻兩種味道。
芝麻綠豆（23307978）
地址：民泰街14號
營業時間：1:30pm-2am
