時間
95年9月20日
活動
李莉莉宣傳寫真集
人物
李莉莉、鄧伯伯
經過
89年挾澳門小姐之名進軍娛樂圈嘅李莉莉，憑住唔怕醜嘅cheap招成功出位，成為經典爆笑人物。佢95年出寫真集，特別搵咗80歲賣金魚嘅鄧伯伯做拍檔，大搞噱頭，佢哋雖然唔係俊男美女配，美感欠奉，不過李莉莉攬住阿伯係咁咀，都咪話唔引人發笑。
當年記者問阿伯覺得李莉莉身材點？佢話：「佢身材都幾正嘅。」對於李莉莉話幫阿伯重振雄風，大爆二人合作影寫真集時，阿伯頻頻去廁所，仲要入去一排至出返嚟，阿伯解釋話：「唓！我緊張之嘛，不過話時話，我後生十年八載，我會起痰㗎。」被封「阿伯殺手」，李莉莉就有啲抗拒，佢話：「我搞得啲阿伯咁掂，叫我做『阿伯醫師』就真。」
李莉莉96年嫁畀煙花大王麥競敏後，婚姻維持咗10年就玩完，一對仔女嘅撫養權歸老公。為咗自食其力，李莉莉舊年重出江湖推出新碟《白髮為你留》，繼續賣弄騎呢cheap招，可惜佢已經唔係十八、廿二，又點同時下班𡃁妹鬥。
