「相見好，同住難」，婆媳同埋一齊住，就更加難，好似網友happyli咁，結婚兩年，仲住喺阿媽度，近日老婆終於開聲要買樓，令佢好煩惱，佢喺《香港討論區》話：「住緊3房1廳，30年舊樓有電梯，550呎。𠵱家新樓800呎3房，都冇我咁大，點解要買過一間嚟供，降低生活指數？而且𠵱家樓價又高，點解要咁急？」
好多網友都幫happyli諗辦法，japanboy話：「不如轉移佢視線，攞一筆錢出嚟叫佢諗吓點樣將舊樓裝修，同時認真向佢解釋一下現在樓價實在負擔唔嚟，但都講吓閣下嘅買樓計劃（開定期票，未必一定做）；最後同佢講，你老媽子嘅樓將來都會留畀你，暫時住住先，等啲樓平啲、負擔較輕時先至買新樓，仲可以將舊樓出租。」
先儲錢模擬供樓
socho就提議：「你不如模擬一下每個月儲起供樓嘅錢，睇吓對生活質素有幾大影響，一方面可以有藉口拖，另一方面又可以當儲錢。」
好多人結婚都係想組織新家庭，如果仲要同對方屋企人一齊住，難免有寄人籬下嘅感覺。最緊要兩夫妻有咩嘢攤出嚟傾，盡量衡量一個最好嘅方法，例如喺舊居附近租樓住，一嚟唔會令阿媽覺得冇咗個仔，又可以還老婆一個心願，都算係權宜之計。