呢日有大機構打電話畀左丁山，一開始就話：「由於涉及一啲事情，呢段談話會錄音，請你注意。」講到明話要錄音，冇所謂啦，大家講嘢均真啲。
跟住聽新聞，知道教育學院院長莫禮時向獨立調查委員會透露佢與李國章以前嘅談話內容，並播出一段錄音帶，李國章話會報復咁緊要。既然膽敢公開播出錄音帶，而李國章把聲音咁容易認得出，相信嗰段錄音冇乜花假。但問題嚟嘞，究竟莫禮時與李國章講電話之時，有冇話畀李國章聽：「此段談話會錄音」呢？假如冇講，李國章算係俾人「裝」咗喎？是否公平呀？假如有講明錄音，李國章自己有冇錄埋一份，慎防其他人斷章取義呀？
以上純屬揣測，但錄音一事，着實令人心寒。大學教授，係知識最高階層，佢哋講說話都要勾心鬥角，「秘密」錄音，好似做卧底咁，聽見都怕怕。𠵱家錄音好容易，手機可作錄音機（不過左丁山唔識㩒掣），開啓後放在西裝上衣內袋，與對方談話可以錄晒。左丁山與同事、老友傾偈，素來噏得出就噏，無甚保留；唉吔，睇完莫禮時頂證李國章「報復」一事，有啲驚喎，自己平時講話容乜易俾人錄咗音，伺機搞針對呀？以後講說話要小心啲先至好，須防人不仁呀。
同李國章、羅范椒芬見過面，食過飯嘅傳媒都知，李教授與羅太都冇乜官氣，說話十分爽，冇乜保留，對記者都咁咯，相信佢哋私底下對啲同事、校長說話，更加直率。如果佢哋事先知道有錄音，唔知會點呢？
教育界近來多事，港大醫學名教授受調查，中科院院士涉嫌抄襲，教育學院引起風波，城市大學聘請校長似做一場戲。有一位人士對左丁山講，城大請校長候選人名單曝光後，兩位候選人本想退出，但其中一位聽校董會高層講，以為自己嘅機會最大，另外一位聽管理高層講佢佔優勢，於是應允出席諮詢會。誰知兩人都被玩殘！高等教育界咁好玩，娛樂版記者以後不如去埋校園昅住！