唉，呢幾年成日聽到有貨櫃車發生嚴重車禍，除咗早幾年屯門公路有部貨櫃車推咗巴士落山外，仲有落馬洲嗰單貨櫃車翻側壓扁鄰線私家車事件，點知前日又整多單貨櫃車壓扁的士，真係諗起都心寒。
呢個世界始終有害群之馬，佢哋永遠只係顧住自己，有時揸車經過貨櫃碼頭，見佢哋諗都唔諗就衝入迴旋處；問心吖，乜你覺得自己孭住咁重嘅貨櫃，咁易煞得停部車咩？仲有好多司機貪方便，夾硬將貨物塞入貨櫃，導致擺放不平均甚至超載，遇着失控想唔翻車都幾難。其實法例已有明文規定，對呢啲超載車輛嘅刑罰，但作為一般駕駛者嘅你同我，倘若喺路面碰到貨櫃車呢類大車，一係即刻踩油離開，一係墮後同佢保持距離，盡量避免平排行車，免得意外時首當其衝，更免得俾佢哋行車時所造成嘅氣流，擾亂自己嘅行車線！
悠穎馳
豪邁不羈，愛車如命，聽幾下引擎聲就知咩車！