喺《香港討論區》有位投資初哥用咗7萬蚊買入中石油（857），再用多萬四蚊買佢嘅認沽輪做對沖，點知唔少網友批評佢呢個組合。
SHAW話：「中石油冇需要買輪嚟對沖，佢波幅唔大，如果你買中移動（941），就話考慮做吓對沖啫。」
kelvinclark就講：「喺香港窩輪市場，好少人買輪嚟做對沖，大部份人買輪都係抱投機心態。除非你有幾億貨，仲要係成份股，咁用1000萬買恒指輪做對沖就差唔多。」
做都唔搵輪啦
網友AhShing搭嘴：「好似航空公司咁嘅石油用家，因業務需要先會做對沖，但就算係買，人哋都會買期油，有幾何聽過會用沽輪做對沖㗎！」solaraixunix就提供另一個對沖油股嘅建議，「散戶買得少，又唔係石油用家，根本冇需要玩對沖，如果真係要對沖，買南航（1055）或者國泰（293）好過，買輪風險好高。」nrnrnrnr仲建議：「如果想降低風險，倒不如月供股票啦，起碼唔使驚輪商縮引伸波幅吖嘛。」
事實上，買認沽窩輪的確有對沖正股嘅作用，不過，東方滙理衍生產品董事李靄欣話，用窩輪做對沖工具，必須揀合適嘅窩輪同數量，先至可以達到對沖效果；另外，亦要注意窩輪時間值損耗，離行使日剩番一兩個月嘅窩輪，時間值損耗風險好高，唔適合做對沖。佢建議每半個月至一個月要換吓窩輪，減低風險。