李蕙敏（Amanda）喺娛圈星運浮沉，事業冇乜大起色，但最近有間獨立唱片公司肯幫佢出碟，所以呢排佢又靜極思動。噚日凌晨兩點幾見佢夜蒲蘭桂坊，佢鍾意蒲夜店嘅嗜好始終冇變，今次同行除咗男朋友外，仲有幾個朋友一齊。Amanda同男友行斜路時，因為佢着住高跟鞋，男友怕佢跣親，所以一路拖住佢隻玉手行。
蘇民峰拖到實
而已為人母嘅徐濠縈噚日凌晨兩點幾同三位女性朋友蒲完中環Dragoni，又行去蘭桂坊玩，途中仲遇到一中一外朋友，見佢停落嚟同個洋漢傾咗一輪，然後行去蘭桂坊，不過佢哋四個女人喺街度商量咗一輪，結果好似達唔到共識，大家分頭離開，阿徐乖乖返屋企。
另外，蘇民峰同女友喺Dragoni蒲完，佢拖住女朋友行過去蘭桂坊再蒲，點知蘭桂坊人頭湧湧，佢為咗護住女友，就拖實女友隻手行。哈！馮仁昭又睇唔出佢幾有男士風度喎。
