台前幕後一樣吃得開嘅谷德昭（肥谷），早知佢鬼馬兼神化，但親身見面又係另一回事！訪問當日，肥谷揸架剛抵港、集SUV、豪房於一身嘅福士Touareg出場，呢架車體形巨大，直接襯托到肥谷好有氣勢，但佢反而鍾意Touareg個樣蠢蠢哋！「咪睇佢賣相唔多兇狠，其實有成241匹馬力，泥地、爛路絕對難佢唔倒，同我一樣有內涵但唔會溢於言表。」咁仲不特止，「我同架車關係簡直好似兩公婆咁密切，得閒仲要同架車傾吓偈，多啲噓寒問暖，大家先Keep得長久！」
文：許一楓
攝影：陳陶鈞
扮失憶玩記者
約肥谷做訪問，早已打醒十二分精神；採訪當日電話響起，以為主角出現，點知佢竟然問係咪約咗影相，嚇得小記冷汗直流！幸好過多10分鐘，佢笑晒口咁現身。擺明玩嘢啫，呢類惡作劇應該撚化過唔少記者！
一見肥谷揸架新款到爆嘅SUV過嚟，小記好熱情咁走過去同佢SayHi，唔知係咪太早未瞓醒嘅關係，佢戴住副黑超，木口木面表情令小記及攝影師飄過一陣寒意，最後惟有硬着頭皮坐上佢架車，驅車直往西貢影相。
樣蠢唔緊要
一上車，陣陣濃烈「新車味」衝鼻而來，事關呢架福士Touareg3.6FSIPremium真係啱啱到港，雖然係大牛龜SUV，不過加入豪華房車元素，坐上去真係好舒服；跑大直路時，肥谷癮起踩多啖油，傳來嘅貼背感覺真係好有迫力，241匹馬力果然唔係浪得虛名。
本以為又In又潮嘅肥谷，一定鍾意古靈精怪嘅車款，始終唔明點解會揸架平平實實嘅SUV。肥谷慨歎話：「人大咗，仲要叫我喺法拉利、波子度爬出爬入，好醜怪啫！我反而享受啲空間大同伸展得好啲嘅車。」見佢「豐滿」身形坐上車，內櫳、座位都Support得佢好Fit，難怪佢讚口不絕，仲以此自我比喻一番：「我就係鍾意Touareg個樣蠢蠢哋唔多醒目，但夠老實同人品好、好穩陣、好紮實又夠Man！」
講保養如數家珍
對於車，肥谷強調自己唔鍾意鍊車，佢係愛車之人，回想以前𡃁仔時代，鍾意約埋一大班𡃁仔研究車：「以前喺加拿大時，逢星期六、日，最鍾意約埋朋友仔一齊，換啲杰啲嘅偈油喺自己架車，又會去搵舊車嘅零件，安裝喺自己架車度，以前我哋真係好神心對待車㗎！」
直至𠵱家，問肥谷應該點樣保養車，佢都可以如數家珍，詳詳細細咁話過你知：「每行幾千公里就要將架車TuneUp，定時Check偈油同車軚……」肥谷自言視車如老婆般看待：「我哋嘅關係好密切，非比尋常㗎，總之你對佢好，佢就會對你好，間唔中你仲要同佢傾吓偈，問佢近來點呀，有無唔舒服，使唔使睇醫生咁囉！」簡直做戲咁做。
最怕鹹魚雞粒炒飯
原來肥谷仲有個鮮為人知嘅秘密：「我唔鍾意俾人掂我架車，代客泊車都唔鍾意，因為我最怕人郁我啲位同車上嘅嘢，High到周圍污糟晒！試過夏天有人喺我架車食鹹魚雞粒炒飯，之後我一開冷氣，成陣鹹魚味標出嚟，嗰刻我心痛到想死！」
短短個多小時嘅訪問，肥谷不斷妙語如珠，最後仲笑笑口以車比喻人作總結：「人一切嘅歡愉都係副偈畀你嘅，有副好偈先可以歎到、食到、享受到，無副好偈嘅話，靚車揸唔到，靚女識唔到，有好嘢都食唔到，所以車同人都好，搞好副偈先最重要！」
Touareg引擎增至3.6公升
Touareg可算是Volkswagen闖入SUV界之作，賣相有型具魅力的同時，豪華車廂配備及出色性能表現，也是車子的賣點；然而，廠方號稱有超過2,300項改動的新款Touareg，亦已經登陸香港。新車的最大改動，就是將引擎容積由原來的3.2公升增至3.6公升，令馬力提升至280匹外，ABSplus系統更可增強車子在崎嶇路面的制動性能，令制動距離大幅縮減20%！
記者：鄭達基
Volkswagen
Touareg3.6FSIPremium
規格
引擎：3,597c.c.V6DOHC
馬力：280bhp/6,250rpm
扭力：360Nm/2,500-5,000rpm
傳動：6前速Tiptronic半自動波，四輪驅動
售價：$620,000