所謂「一子錯，滿盤皆落索」，一個錯誤嘅投資決定隨時會帶嚟難以估計嘅後果。到底網民最錯嘅投資決定又係咩呢？
網友psugrl喺《MSN》討論區留言話：「我覺得最錯就係過去4年都冇儲錢，成日出街食飯兼揮霍。如果當時我願意繼續住喺細單位、唔走去換樓嘅話，每個月至少可以慳番300蚊美金，但我𠵱家先發現呢個問題。」
MuttLover亦認同：「我認為做得最錯嘅兩件事：用太多錢買樓，又冇講價，結果買貴咗；仲有過去幾年恃住後生亂咁使，搞到冇錢剩。」
pondhopper1歎道：「住得豪但冇錢用有咩好呢？雖然我好後生就買樓，但如果畀我揀，我寧願有多啲現金喺手，可以有錢去做其他投資，例如買定退休基金。」
因財失義都好慘
不過，一樣有唔買樓、將啲錢拎去投資嘅網友感到後悔。deesquared話：「我覺得最後悔係買咗高收費嘅投資計劃，仲有買咗份終身壽險，好彩後尾我識改買定期壽險，先可以慳番唔少保費咋！」不過，cawiau認為最弊莫過於借畀人，搞到因財失義，「借錢畀親朋戚友唔單止要預佢唔還，最慘係搞到大家連朋友都冇得做。」