早幾日有對夫婦疑因財務問題，驚冇錢供樓，一時諗唔開齊齊喺屯門大興花園燒炭自殺，好彩男戶主見妻子痛苦難耐，打消尋死念頭。
呢單新聞引起《香港討論區》網民廣泛討論，網友n6488話︰「咁小事就要燒炭，何必呢？小弟97年摸頂入貨，兩公婆先後失業，當時月供9000蚊；之後兩人雖有工返，但月入少咗50至60%！好彩有家人幫助，03年已供完。十年人事幾番新，今日已有自己嘅公司，又有錢買多一間大啲嘅單位自住，層蟹貨放租有4500一個月。」
大不了破產再嚟過
OOMAN亦話：「冇咩比生命更加重要，只要留番條命，就有希望，大不了就係破產。我係過來人，99年曾經破產，今日我咪又係活生生。重生係辛苦，但睇見今日自己重建資產，我慶幸當日冇輕生。」
程式狩獵人亦講咗佢段悲涼往事︰「我先後創業兩次，第2次撞上沙士，輸咗成百萬；打工攞唔番原本創業前嘅人工，積咗50萬卡數，仲要供樓、養家，到今日，我仍然在生。路就一定有得行，問題係點去行。死！唔係解決問題嘅方法。」