第一屆YouTube「奧斯卡」，即網站舉辦的官方短片大獎（YouTubeVideoAwards）剛於上星期圓滿結束，當中並未有香港人拍攝的短片入圍，正如李力持所講，香港人拍的都太隨身沒有心思，如果你想下屆奧斯卡有你份，就要聽導演教路。不過即使是隨身拍，都會有意想不到的結果，就像阿Jon及步飛咁，無心插柳，結果紅到全港甚至連外國都有報道。咪睇小呢啲粗製濫造嘅短片，要平地一聲雷都係靠佢！
記者：黃若茵
攝影：林栢鈞
拍片人各有出路
Case1：扮餅碎變專業製作人
還記得5年前一班男生剃晒腳毛扮餅碎嗎？咪就係Aunties囉！起初呢班大學生只係諗住搞笑，點知令全香港都識佢哋係乜水，創辦人之一步飛話：「開頭拍片係諗住畀朋友睇，點知會有咁多人睇和討論。」走紅後，WeWamp3搵佢哋做代言人，俾佢哋做埋導演，𠵱家佢哋更搞埋productionhouse全職拍片。
講到技巧，佢話無論手機或攝錄機，最好喺日光日白拍，要用腳架或物件固定防手震，最緊要有主題。
Case2：拍巴士阿叔拍到心驚驚
巴士阿叔紅透半邊天，揸機人阿Jon頓時成為傳媒追捧對象，試過從訪問中取得4位數字報酬，又同網站www.ishow.com.hk簽約拍宣傳片和撰稿，再賺取4位數字收入。事隔一年，Jon居然話唔再拍短片，甘願平淡地做個文員：「巴士阿叔事件搞出好一陣風波，好多記者追訪我，令到屋企人好擔心，因為我唔想再影響家人，所以無再拍。」
Jon認為拍呢類生活化、社會性嘅短片本質上係好，因為鏡頭係客觀直接嘅描述，唔易被傳媒扭曲。「其實用手機拍片好難有要求，因為手機質素一般，最緊要拍出嚟嘅嘢睇到聽到就已經足夠。」
香港人忙缺心思
李：李力持 蘋：蘋果日報
蘋：幾耐會睇一次YouTube？
李：每日都會望吓，每次大約半個鐘左右。
蘋：點睇香港人拍嘅短片？
李：無聊！香港人好忙時間少，拍得求其，有嘢發生就拍，根本無度過橋。「巴士阿叔」段片咁紅根本係狗屎撞棍，毫無主題可言。
蘋：鍾意YouTube內哪類型短片？
李：比較鍾意外國人拍嘅短片或廣告，整蠱人同搞笑得嚟都有心思。
蘋：有冇任何心水或印象深刻嘅片介紹？
李：記得一個以「TheFiveSecondRule」做主題嘅短片，即係話食物跌喺地上5秒內仍食得嘅theory，條橋度得搞笑。另外有一個香口膠廣告，講印度人食咗之後牙齒白到當燈咁用，真係好funny。（哈哈哈）
蘋：咁你有冇用手機拍短片？
李：我通常只會用cam拍，手機嘅質素好唔得，我諗要過多一、兩代先會比較好。
導演教路：入門切忌用變焦鏡
蘋：相比起電影，拍短片有乜好處？
李：短片係入門級，易掌握又可培養興趣。
蘋：故事方面可怎樣取材？
李：可信手拈來一啲已有嘅題材，例如將當時嘅熱話加以發揮，甚至係從前「歡樂今宵」嘅橋段都得，總之要簡單好笑又有故事性。
蘋：以漫畫作藍本去拍又如何？
李：有好有唔好啦，好在已有晒畫面場景同分好鏡頭，但難在有啲畫面好難跟足。所以要揀適合拍片嘅漫畫，譬如《老夫子》就簡單易學，又有gag位。
蘋：初拍片者要注意乜嘢技巧？
李：最難學係變焦鏡（Zoom），因為速度一定要控制得好，鏡頭要定，否則畫面亂七八糟，簡直學壞手勢。拍片初哥最好先學closeup、wideshot，因為容易剪接，鏡頭穩定又睇得舒服。
蘋：咁演員服裝、聲效等又有乜嘢要留意呢？
李：哎呀，初哥就咪搞咁多嘢啦，搞掂條橋好過！
印度人
http://www.youtube.com/
watch?v=uNp__DdSyCg
內容：皇宮內的水晶吊燈上坐滿男人，原來大家食完某牌子的香口膠後，都可利用牙齒替皇帝照明。
TheFiveSecondRule
http://www.youtube.com/watch?v=u1z6OCRJVks
內容：根據「5秒鐘的理論」，食物掉到地上5秒內仍可進食，即使掉在屎上都可再食。
李力持＋UMovie
導演李力持現在和拍過Aunties嘅UMovie大學生合作做productionhouse，接拍宣傳片、廣告等，上星期佢哋到《喜劇之王》拍攝地點石澳，模仿經典劇情拍一輯宣傳片，睇吓佢哋有幾專業啦！
最爆土炮短片
豉油街掟煲事件（Part1）
瀏覽人數：約213,900
內容：暴力男友在深夜於豉油街跟女友鬧交，一個sidekick踢到女友彈開幾尺遠，驚動警察介入。
李力持評語：「無聊！」
http://www.youtube.com/
watch?v=WoRJOozDSLU
心花怒放
瀏覽人數：約73,917
內容：拍片人綽號「湯河」，經常模仿容祖兒MTV，又跳又唱，男人身女人聲極難頂。
李力持評語：「成個配搭錯晒！就好似盧海鵬咁，係好好笑，但睇多一陣就唔想睇。」
http://www.youtube.com/watch?v=unl1WepVVTs
巴士四眼仔欺負82歲老翁（Part1）
瀏覽人數：約16,922
內容：四眼後生仔將手提袋放喺座位上，拒絕讓座給82歲阿伯，車上乘客個個話佢人渣。
李力持評語：「都唔知佢做緊乜！」
http://www.youtube.com/watch?v=TB8TX1T7_Tk
教師搞笑賀年片
瀏覽人數：約2,600
內容：沙田一間小學的教師，拍攝賀年載歌載舞短片，片中老師的歌聲功架都非常搞笑。
李力持評語：「欣賞一班老師能放下身段合作拍短片，有鼓勵學生拍片的動力。」
http://www.youtube.com/watch?v=1jYqBzTd-kE
後生仔愛短片
