近年荷李活恐怖片得兩種，一係照抄亞洲片，一係賣弄血腥，已經好耐冇好似《鬼眼》（TheSixthSense）嗰種有腦有演技之作。好彩今個星期四喺本港上映嘅《魔疫》（TheReaping）行番呢條路線，故事唔單止取材自聖經10災預言，更由兩屆金像影后希拉莉史雲克（HilarySwank）擔正，個監製又係信心保證，肯定唔會粗製濫造。 撰文：戶川淳
本周四喺本港上映嘅全新恐怖片《魔疫》入面，希拉莉史雲克飾演一位拆解宗教迷信現象嘅專家嘉芙蓮，佢到路易斯安那州一個小鎮調查連串同聖經預言一樣嘅疫災。當地人將罪魁禍首推到一個神秘小女孩蘿倫身上，話佢係魔鬼化身，雖然嘉芙蓮相信個女仔係清白，但當佢越接近神秘事件真相，越發現自己陷於恐怖陰謀。曾對上帝產生懷疑嘅佢，決定尋回失去嘅信念，同終極邪惡決一死戰。
千萬蝗蟲突襲
齣戲最得人驚嘅係片中出現咗《舊約聖經》中，出埃及記所記載嘅10種災害，分別係河水忽變血、青蛙從天而降、虱災、蒼蠅為患、牲畜染病、行雷閃電天降冰雹、瘡災、蝗蟲為禍、黑暗降臨同擊殺長子之災。呢10災原來係上帝為迫使法老王解放以色列人而降下嘅，如今利用電腦特技喺戲中重現，尤其係千萬隻蝗蟲突襲希拉莉嘅一幕，喺戲院預告睇到時都已經身痕，驚蟲蟲嘅觀眾入場前真係要帶定殺蟲水。
除咗兩屆金像影后擔正同超驚嚇影像外，齣戲其他班底成員都十分之勁，監製係《轟天炮》（LethalWeapon）同《22世紀殺人網絡》（TheMatrix）嘅金牌監製祖舒路華（JoelSilver），呢位鬍鬚叔叔一向擅長搞動作片，今次再配上人氣電視劇《24》導演StephenHopkins執導，深信會比一般恐怖片節奏更快。
獎門女邪上身
至於飾演邪惡女孩嘅就係曾於《朱古力獎門人》（CharlieandtheChocolateFactory）入面，挑戰𡁻香口膠紀錄嘅刁蠻女安娜蘇菲亞洛（AnnaSophiaRobb），片中佢已經大個咗好多，今次佢一句對白都冇，只係以眼神同表情演戲，睇戲時不妨留意吓佢嘅演技有冇突飛猛進。