圍棋分九段，最高係九，十段係榮譽，唔係級別。喺《158理財在線》上，網友認為理財境界亦可按照風險大小分九段。
一至三段：自立基礎
一段──儲蓄，係理財嘅基礎，亦係一個人自立嘅基礎。源於計劃同節儉，係一個人自立能力、理財能力嘅最初體現。
二段──買保險，除咗係一種理財方式，亦係一個人對家庭責任感嘅體現。
三段──買債券、基金、同其他低風險金融產品，呢個可以講係投資者初階，就算蝕亦唔會蝕入肉。以上可以歸納為同一個層次，即個人理財初階，特點係低風險、低回報。
四至六段：考驗實力
四段──炒股票、期貨，考驗投資者嘅經驗、學識同運氣，當中涉及風險，籌碼可大可小。
五段──買樓，係以投資為目的，唔係自住。房地產投資由於涉及金額較大、流動性較低，參與難度相對較高，所以高過炒股一段。
六段──投資藝術品、收藏品，呢個屬於小眾投資，需要更加專業嘅知識、更有耐性，亦需要更雄厚嘅財力，因為流動性更低，參與難度更高。
四到六段係個人理財中級層次，投資品種都屬於高風險、高回報，需要專業知識，同一啲運氣，最緊要係需要一啲實力。敢於冒險嘅人，利用槓桿效應，可能因而致富，當然，運氣唔好隨時搞到一身債。
七至九段：成事在人
七段──投資企業產權，簡單啲講即係自己做老闆，開間公司又得，買間公司番嚟都得，意義就係《富爸爸，窮爸爸》裏面講嘅：要有自己嘅事業，唔好打死一世工。
八段──購買與打造品牌，已經去到八段嘅理財高手，應該着眼喺長遠嘅品牌建設，博取高於社會平均水平嘅超額收益。
九段──投資人才，真正嘅老闆善於發掘同運用人才。聰明人往往會請比自己更聰明嘅人，能夠成就大事業嘅人，會信任同控制比佢更聰明嘅，等日後將自己事業交畀佢哋。理財高手最高境界唔係投資喺物體上面，而係投資喺人才上面。
