在皇后大道中行街，碰到投資名人老Ｔ，於是一路行一路傾。老Ｔ好多時唱好或唱淡，命中率甚高，左丁山問佢點解咁好嘢。老Ｔ話：「阿叔喺一九七一年已經炒期貨，學走勢，卒之輸到一仆一碌，早年交過咁多學費，受過血的教訓，𠵱家梗係知道Timing（時間性）嘅重要啦。若果市好時唱淡，市淡時唱好，瓜多過菜㗎，阿叔積累多年經驗，昅住個走勢圖與美國數據，感覺大市就快跌之時就唱淡，感覺大市就快升之時就唱好，故此容易命中。如果過早（例如半年）唱好或唱淡，會俾人鬧㗎。」
老Ｔ果然係老薑，知道利害所在。唔怪得滙豐證券發表報告，話分析師預測公司盈利愈來愈準確，但在股票推薦方面，輸多贏少。但佢哋竟然冇老Ｔ咁醒喎，往往都係要等到大市升咗，先至叫人買入！
同老Ｔ講起大公司總裁離職，有何影響，老Ｔ話：「凡係大公司，個人去向唔會影響股價，故此總裁辭職，毋須重視。我反而有一點要講畀啲後生仔聽，唱衰舊老細，前途有限。」咦，老Ｔ擺錢入我袋喎，立即追問清楚。原來老Ｔ在公司面試求職者之時，一定問一條問題：「你點解要離開𠵱家呢間公司？」求職者想轉工，梗係有好多理由啦，其中一項就係：「我老闆好鬼衰，刻薄啦，獨裁啦，鍾意靚女啦，任用親人啦……」老Ｔ大凡聽到呢個理由，就會用鉛筆喺求職信打一個記號。人事部門見到呢個記號，就唔會請呢位求職者。
老Ｔ認為如果老闆依足聘約出糧，就唔算虧待夥計，你如果要離開，請便，但今日唱衰舊老闆，明日我請你，你一旦離開，又會唱衰我嘅啫。商界就試過有一啲高層，領取三四千萬元年薪花紅，辭職時攞足補償，但一出門口就話舊老闆難頂，實在冇口德。老Ｔ之言令左丁山記起《三國演義》，曹操每俘敵將，一定審問，凡敵將大罵曹操，仍然對舊主忠心耿耿嘅，曹操就想辦法收歸己用，但如果敵將搏命擦鞋，唱衰舊主嘅，曹操就會下令斬無赦！