衞蘭前晚首度在紅館開騷，她與孖妹衞詩無懼身上的豬腩肉，穿上設計師AndyDaniel設計的服裝，大賣性感。
時裝設計師鄧達智看到有關照片，他昨日在電話中說：「你唔講我仲以為佢係張惠妹，佢啲衫嘅設計娘就好肯定，好有80年代feel，一啲都講唔上fashion，不過着喺佢兩姊妹身上都好可愛。始終佢哋係實力派歌手，佢哋知道自己係sell歌藝，唔係sell形象。如果100分滿分，以娛樂角度去睇，我會畀佢80分，但以時裝角度就得50分。」
對於衞詩的護翼泳衣look，鄧達智說：「好拉斯維加斯嗰啲感覺。」談到Janice的紅色旗袍，他說：「似癲雞囉，但好過癮，帶畀人喜氣洋洋。佢另一套露背裝，個髮型太求其，好似趕住出場咁。」
採訪：比華利