噚日上落市，又見股仔狂炒，其中20大升幅股當中有4隻成交過億元，升幅由18%至56%不等，升得最勁係隻中國資源（661），勁升56%。呢隻又係轉型搞礦務嘅股仔，本周一停牌，噚日復牌公布重大交易，以3億銀收購蒙古阿雷努爾鉬礦51%權益，以每股作價0.3元嘅新股支付。
搞礦搞到蒙古咁遠，仲要係鉬礦，對普羅本港投資者真係好陌生，有心投資呢類股仔，通告要睇得好詳細。通告話，收購對象主要從事鉬及鎢之開採及採礦，鉬擁有高熔點攝氏2625度，主要用作鋼、生鐵及超合金之合金劑以提高堅硬、抗磨等合金特質；鎢在所有金屬中擁有最高熔點攝氏3400度，廣泛應用於航天、軍事、造船、電子及化工業。
研究礦務股，要睇儲量幾多同採幾多年，通告指阿雷努爾初步已探明鉬金屬儲量為57000噸，「遠景」儲量為10萬噸，開採期至2065年12月4日，係採礦權唔係勘探權，咁都冇咁驚。通告又話鉬精礦現市價每噸約20萬元人民幣，咁儲量咪值過百億元？用3億元買到儲量值百億元嘅礦務股一半權益，睇落都幾着數，但要睇埋採礦成本至計到數。
嚟緊都有隻鉬礦股上市，內地第3大鉬礦企業的洛陽欒川鉬業集團礦山公司在欒川擁有全球最大的鉬礦，儲量達206萬噸，206萬乘以20萬元人民幣，都唔識計有幾多個零。
中國資源前身原本為陳發柱家族經營的添發慶豐，但因出現財務困難，股權幾經變動，一度落入民企富豪周偉榮手上，並且部署轉型為資源業務，但其後周氏在內地被扣查，股權又再度易手，並且由現任大股東王健生接手。
睇完通告，答案係呢類股宜炒不宜揸。