英超家陣嚟到白熱化嘅階段，前列球隊為錦標而搏命，下游球隊就為護級而努力，上演一幕足球版嘅《逃》！不過走都要夠氣夠力先得，所以聽晚韋斯咸主場對米杜士堡，以「鎚仔幫」嘅爭勝決心，必食無慾無求嘅「米堡」充飢，主隊少讓平/半，一於去馬！
賴恩
韋斯咸上場爆冷贏布力般流浪惹嚟唔少爭議，泰維斯博到嘅12碼，到佢企喺白界線唔算越位，結果「屈死」布力般；與其話係球證偏幫，倒不如話「鎚仔幫」命不該絕，攞咗保命嘅3分之後，韋斯咸護級希望重燃，只要佢哋喺嚟緊8場比賽生生性性，真係可能「逃」出生天㗎！
米堡陣殘無慾無求
講番聽晚場波，韋斯咸喺主場比賽，先有地利之助；陣容方面，韋斯咸除咗厄遜同埋艾殊頓兩名傷兵之外，就只係得史碧達坐波監無法上陣，其餘球員都可以悉數候命。反觀米堡方面，今仗除咗冇乜戰意之外，陣中停賽同傷兵問題都幾嚴重，先係中場嘅占士摩利臣同埋卡達莫停賽，然後係艾卡同埋巴廸斯因傷上陣成疑，如果唔係活基治傷癒復出，米堡個陣真係殘上加殘。
不過睇番米堡呢排表現真係冇乜信心可言，或者因為佢哋𠵱家情況係「高不成、低不就」，贏輸對最終排名影響唔大，所以呢場波送多3分俾韋斯咸都唔奇。不過值得注意嘅係韋斯咸後防唔係咁穩，球員防守唔專注係佢哋失波頻頻嘅原因，所以今場波，除咗捧「鎚仔幫」2.2倍單W同埋上盤之外，1.95倍嘅入球「大」都要兼顧。
扒冷撐亞琛「客勝」
冷選方面，筆者就繼續睇好德甲嘅亞琛，上次推介佢地主場「半勝」雖然失手，不過最後都淨勝比勒費爾德兩球，聽晚佢哋將會作客史特加，以亞琛今季嘅客途表現，加上史特加近況亦唔見好，一於再追多次亞琛2.1倍「客勝」，再冷敲4.9倍「半勝」！
投資特攻隊金句
「所謂『七分努力三分運』，韋斯咸呢排真係紅運當頭，何況佢哋不論係鬥心或者陣容都比對手強同齊章，兼享主場之利，寧買當頭起，再撐多舖冇壞！」