上周末及周中嘅過去兩輪國際賽，幾支強隊連番令捧場客喊打喊殺，飛就孭到喇，但波或者盤就贏唔到喎！相信唔少球迷最近個思維，都應該要稍被調節，暫時對強隊都係抱避忌心態，少掂為妙。
爭標最後直路必拼
呢個禮拜又到番曼聯、車仔、巴塞、國米等強隊登場，臨近呢個季尾時候，以上各勁旅都到咗爭奪最重要嘅聯賽錦標嘅最後直路。除咗球會領導層及球迷希望捧得聯賽冠軍呢項極具代表性錦標，同大家一樣都係人嘅球員，亦會有相同、甚至係有過之而無不及嘅心態去搏命，對待態度跟仲有成年賽程未打嘅歐國盃外圍賽，完全無得比。
所以，雖然華度自問唔係「強隊奴隸」，逢出必捧嗰隻，但由國際賽期返番去聯賽，始終唔可以用相同思維去選材。尤其曼聯嘅朗尼及車仔林柏特等英格蘭國腳，踢國家隊唔掂，但一返到去球會就虎虎有威，都唔係冇前科。
唯一要擔心可能係列強下周中又要踢歐聯及歐協盃，不過對手情況都係一樣，相信點都會搏埋呢個周末場聯賽先；曼聯、車仔、巴塞、國米都分別喺主場出擊，或者作客出戰弱旅，唔望佢哋全部同我嚟個波盤齊贏戰果，開個W炒埋一碟都有幾唔錯嘅分頭吖！
文：華度