等了又等，傳聞中嘅黑色兇獸ZondaRoadster終於到港，巴閉處唔係在於只此一部，而係蝙蝠車外形搭650匹V12偈，賣成千一萬居然都有人訂！
呢部SuperCar來自意大利嘅Pagani，分別有ZondaRoadsterF同埋ZondaR；前者個樣同舊款Zonda差唔多，但當你細心啲睇嘅話，唔難察覺部車變咗做開篷跑車之餘，就連車身嘅包圍部件都要比硬頂版多，令人睇落成部車都好有跑格。而佢用嗰台7.3公升V12引擎更加唔講得笑，因為單係馬力輸出已經有成650匹，試問世間仲有咩車可以追到佢？但最重要係呢部未連稅已叫價560萬嘅SuperCar，全球只限量生產25部，有傳香港拎到兩個配額，夠巴閉喇啩！
至於啱啱喺早前日內瓦車展先正式亮相嘅ZondaR就仲勁，佢完全係為咗賽道而生，造型同其他Zonda型號一樣咁型咁惡之外，佢更用咗嚟自AMG嘅6.0公升V12引擎，馬力輸出達750匹，而扭力更可以去到72.4kgm，難怪新車由靜止起步加速至100km/h，需時都不過係3.8秒！
呢兩部咁勁嘅SuperCar，將會於今日喺柴灣嘅SPS作揭幕儀式，Fans們不妨去睇吓有無機會一睹佢哋嘅風采喇！
查詢：SPS（31596800）
記者：周達之、鄭達基
攝影：陳盛臣
車迷點睇？
陶存厚（《車買家》總編輯）：
Zonda可以將一部跑車嘅內在美展現喺佢嘅設計身上，同法拉利比較起嚟，Zonda嘅限量程度更高，設計更唯美，揸出街收視率更高，我會形容佢係「公路上的魔鬼」。
Wayne（SPSMarketing）：
Zonda係集古典與科技於一身，內櫳設計相當懷舊，但外表及所用引擎卻十分高科技。Zonda能夠吸引到一班喜歡享受駕駛樂趣及有個性嘅買家。
