等食壽司<br>長龍壽司店喪排２粒鐘

等食壽司
長龍壽司店喪排２粒鐘

學林海峰話齋，今時今日食手握迴轉壽司，排隊起碼排成9個字，超低能；彷彿唔排隊就等於唔好食，勁搞笑。不過有時排完成粒鐘隊，結果換來一肚氣，唔抵又花時間。今日一次過走訪各間長龍壽司店，再比比各店三文魚，睇吓「你低能，定係我搞笑」。

記者：朱崇德、梁學文、王俊榮、劉嘉蕙　攝影：陳陶鈞、陳偉強

1.和花亭　活魚日日到港

分店：海運店　
排幾耐：最少30分鐘，最高紀錄排2個鐘

賣點：和花亭的活魚特多，而且差不多日日都有專機運貨。晚市7、8點起碼要排半個鐘，試過有人排成兩粒鐘，都照排可也。和花亭4間分店分別位於海運、apm、上水廣場同始創中心，4間店都要排隊，排得最厲害的是海運總店。點解？因為總店的日本活魚最多。活魚日日搭飛機抵港，由東京築地市場同北海道直接返貨。每日上晝上機，下晝就會送到，晚市就食得到，想試即日鮮的飛機貨，最好就是晚上7、8點來，不過就得有耐性排隊。

豆紙鰻魚壽司$18/件

日本來的豆紙用黃豆製，有豆香味又可以減少魚的油膩感。

和花亭波子壽司$22/件

波子壽司由免治吞拿魚、海膽、甜蝦、三文魚子加日本葱做，5種材料的鮮甜味一次過在口中爆發。

比試：三文魚壽司$10

重量：20g
長度：5吋
色澤：光身
脂肪：分布平均

食客意見

Apple：「Teatime來唔使排又有折。」

和花亭（35862622）　
地址：海港城海運大廈OTG03舖

2.板前壽司　長等位

分店：世貿中心對面
排幾耐：周六日晚市平均派200、300個籌，預最少等兩小時有位

賣點:目前有7間分店嘅板前開張三年來新聞多多，最近啱啱開埋又一城同機場分店，落足本搞裝修。識揀位係致勝之道，旺區銅鑼灣分店開正世貿對面，條隊成日排到出總統商場，搞到路人行過唔知乜事都想趁墟，試過一晚派完400張飛，都未開始叫1號！斷估排嘅多，食嘅少。

●板前新出品，象拔蚌夠鮮甜。

●迴轉壽司價食高級貴魚。

比試：特大三文魚腩$25

重量：49g
長度：11吋
色澤：三文魚有光澤，夠新鮮
脂肪：一半肥一半瘦，唔會太肥膩

食客意見

盧先生及家人
「今次一行8人5:30pm嚟攞飛，仲攞定兩張，排咗3個幾鐘，中間睇咗場電影打發時間，但返嚟連第一張飛都未叫到。」

司徒先生
「今次第二次嚟等，上次等咗半個鐘，覺得太耐走咗人。」

板前壽司（21108504）
地址：銅鑼灣東角道24-26號1-3號舖

3.峰壽司　月賣30萬碟三文魚壽司

分店：創興廣場
排幾耐：周六日晚市，由傍晚6pm-11pm，任何時間都有近30人排隊

賣點：銅鑼灣壽司排隊名店，最近進軍旺角區，結果一樣係－－排！全店約60個座位，平均每日客量500-600，非常驚人！以正宗日本師傅做即「練」壽司，加上價錢唔貴，係旺場原因。三文魚壽司最好賣，負責人表示：「三文魚我哋會特選近三文魚腩位，而非用正魚腩，好處係半肥半瘦，唔會太肥，咁樣食法會較健康！」佢哋呢款三文魚壽司平均月賣30萬碟（旺角店），好唔好味？好明顯啦！

特大炸蠔$25

以日本著名廣島蠔作此菜，蠔質味Creamy唔油膩。

比試：特大三文魚腩$25

重量：49g　
長度：11吋
色澤：三文魚有光澤，夠新鮮
脂肪：一半肥、一半瘦，唔會太肥膩

食客意見

蕭生/蕭太/劉小姐
10點嚟食，就係聽人講驚等位，希望夜啲嚟唔使等；今次嚟都係等咗半個鐘，OK吖！

峰壽司（35869515）　
地址：旺角彌敦道601號創興廣場地下

4.昭陽　銅鑼灣首間壽司劈場

分店：金百利商場
排幾耐：周六日晚市，平均有20人以上排隊，最高紀錄上100人

賣點:昭陽係銅鑼灣區首個壽司劈場，$8/7吋壽司由此攻入購物區！劈場好處係去貨快冇隔夜，日日新鮮正貨。老闆馬生做香港魚排出身，同日本魚生供應商特別熟，經常攞到平價靚貨。晚市排隊平均上20–30人，輪隊時間大約30分鐘。最近新出優惠，只要在同座的金百利商場，惠顧任何日本料理店，憑單尾可以當8折優惠券使用，真係不失劈場本色。

吞拿魚海鮮卷$48

以蛋皮包裹粗切吞拿魚，配青瓜、蟹柳等，吞拿魚味香，配菜鮮口惹食慾。

冰火三文魚/甜蝦$20

以天婦羅醬輕炸壽司飯，入口微溫軟脆，一冷一熱有特色。

比試：三文魚壽司$15/件

重量：60g　
長度：7.5吋
色澤：肉質橙紅，清楚見到肌肉紋理一絲絲，好新鮮
脂肪：真係好近魚腩部位，脂肪比例好好，入口有溶化感覺

昭陽（29888441）　
地址：銅鑼灣記利佐治街1號金百利商場5樓3號舖

5.壽司正　濃淡豉油任點

分店：百樂酒店
排幾耐：周六日繁忙時間幾十個，約半小時有位，平日晚間其實唔係好需要等位

賣點:過江龍「壽司正」係日本仙台人氣壽司店SushiKan第一間香港分店，舊年10月開張時一度墟冚。店內一大特色係提供有兩隻豉油任點，味道淡嘅昆布豉油專點貝類及白肉，而色深味濃嘅吟釀豉油就同深色魚生最夾。壽司正沿用日式裝修，佢哋最引以自豪係條迴轉帶，格仔花紋有LVMonogram感覺！

●原隻帶子壽司一個周末可賣過百碟。

●饅魚自家燒製，非常肥美。

比試：三文魚壽司$9

重量：15g
長度：4吋
色澤：淺紅偏橙色，上面啲黑魚子仲搶過佢
脂肪：分布均勻，偏瘦

壽司正（21914787）　
地址：尖沙嘴百樂酒店地下G5-8號舖

6.味壽司　價錢取勝

分店：西洋菜街總店
排幾耐：約20分鐘，周六至少排30分鐘

賣點：味壽司開在西洋菜街，以平價硬撼其他壽司店，當然不乏捧場客，不過因為可以訂位，排隊情況就唔係太厲害，weekday一般排20分鐘左右就有位，weekend就排半個鐘。店分兩層，樓下是壽司吧，樓上是柯打散座，座位唔太多，人一多都幾迫夾。沒有日本師傅，亦沒有特別活魚，不過就以價錢平見稱，9蚊雞就有交易。

玉子鰻魚$16

煎蛋內藏鰻魚，味道帶甜，限量供應。