陶大宇與太太離婚，郭羨妮被傳是第三者，昨日成為圈中熱門話題，曾跟大宇傳緋聞的宣萱表示絕不會做第三者。
宣萱：
我同阿寶（黃慧寶）打過羽毛球，以前夠傳過我，傳吓傳吓就冇啦。大宇係正人君子，作為同事同朋友，佢絕對係好人。不過我一定唔會做第三者，盞自己煩。
薛家燕：
我係（離婚）過來人，我情況唔同，我老公有三、四、五者喎，希望話郭羨妮介入唔係真啦，對藝人嚟講有太多緋聞唔好㗎。如果兩公婆唔夾，離婚都係好事。
鍾嘉欣：
樂小姐講得好啱，呢啲新聞好影響藝人，我相信冇女人想要狐狸精呢個名。
佘詩曼：
我唔信Sonija（郭羨妮）會咁，我見到Sonija會同佢傾幾句。自己就會盡量小心形象，男女關係以唔傷害到人哋為原則。
廖碧兒：
我呢幾日同大宇開緊《和味濃情》，佢開工好專業。
胡杏兒：
覺得Sonija好易畀人做話題，平時打電話畀Sonija覺得佢好深閨。不過唔好話有婦之夫，冇婦之夫都要避啦。
郭晉安：
拍戲我會百分百投入，返屋企會做番好丈夫，我好少呢啲緋聞，啲報道係少好多，但喺觀眾心目中就有個好形象。
採訪、攝影：卓美娟、梁錦雯、張俊銘、林德雄