近嚟講來講去都係Xbox嘅《忍者外傳》，有人更誇張話玩過佢就乜都睇唔上眼。呢個世界天外有天，美國《戰神》萬人皆讚，如今推出續集，內容與玩法都加足料，輕易贏得鬼仔歡心，鑑於鬼佬近乎逢SONY必反，有咁高分就知此作絕對唔嘢少，《戰神2》暴力程度爆晒燈，盒面仲標明「家長指引」先玩得，小朋友自己一個人玩？免問喇。
文：陳福榮
喺05年美國SONY推出咗《戰神》（GodofWar）呢隻全3D動作遊戲，以打得燦爛，殺得誇張，瘋狂灑血博取歡心，《戰神2》事隔兩年重來，玩法由原先嘅《DevilMayCry》繼續無止境咁Upgrade，依舊贏得外國傳媒歡心，唔少Game網，包括Gamespot、IGN同Gamespy都畀至少9分。
內容緊接前作繼續發展，滿身傷痕嘅疤面煞星Kratos雖然已成希臘諸神一員，不過佢本身好戰兼好勝唔甘於平淡，所以做咗戰神仍不停策動斯巴達軍團周圍開拖，令佢老頂宙斯同雅典娜非常不滿。
後來呢兩父女玩嘢出賣咗Kratos，將佢掟離奧林匹克山幾乎死咁滯，幸得大地女神蓋亞先執返條命，為咗報仇，戰神於是踏上不歸路，接受蓋亞引導，直奔「命運姊妹」神殿……
堪稱最暴力血腥
唔少鬼佬Game都視血流成河如無物，打得唔夠激唔夠誇反而會俾人彈冇賣點。今集揸住鐵鏈刀係咁片人，輕則鮮血狂噴，重則身首異處、銃穿五臟六腑，唔係咁又點會拎到「家長指引」呢個Rating？其實睇見Kratos個衰款，成身刀疤又惡死能登，話佢係正義使者真係搵你信。
今集嘅Kratos仲係帶住雅典娜之劍，但班卒仔又好打到爆，好彩可用大劍或者大鐵槌，咁先至冇咁惡頂咋。另外，動作鍵R1好重要，用佢嚟開寶箱、飛天遁地甚至推箱解謎，用腦程度隨時比得上《薩爾達》，唔再係單靠斬斬劈劈。
食腦打波士花臣多
《戰神2》亦有好多點子來自《DMC》，但一經比較即時立見高下，例如喺遊戲初段就會有個巨人瘋狂襲擊Kratos，動作順滑之餘，亦諗唔到佢啲畫質居然保持到咁高水準，兼且遊戲場景與交代故事部份之間嘅轉換都冇乜讀碟，稍不留神真係死咗都唔知咩事！
講返《戰神2》打巨大波士，佢係即時運算，唔係好似《Bio4》咁播CG片咁渣斗。斬幾嘢打跌佢就會出現提示，只要喺限定時間內走埋去㩒掣就會變成睇片，不過必須要喺途中㩒啱掣先至OK，否則行動失敗之餘更會慘遭痛擊，隨時因此一嘢收工。
機種：PS2
廠商：SCE
類型：ACT
人數：1人
價格：$428
售賣點：I-Gamer
（27253338）