女人要湊仔搵食身兼兩職甚艱難，男人還要做廿四孝老竇則更是難上加難，張家輝便是一例。太太關詠荷最近返無綫拍劇，家輝父兼母職，照顧一歲大的囡囡Brittany。雖然對愛女呵護備至，但稚童少不更事，更試過因感到陌生推開家輝，令他心靈受創，下定決心爭取時間陪愛女。
近日關詠荷復出拍攝無綫處境劇《同事三分親》，福將回巢大受歡迎，不過藝人事業家庭往往難以兼顧，關詠荷每次開工都要暫時放下母職，由老公張家輝兼任湊仔公。幸好家輝現時電影工作不算太忙，可以爭取時間與一歲女兒Brittany相處，全職做廿四孝老竇。
安裝視像少出埠
近兩年來家輝的電影一部接一部，產量豐富，他笑說：「05至06年我係最多產演員三甲。」問他是否計劃密食賺奶粉錢？家輝說：「唔係，只可以用豐收嚟形容，我想同多啲人合作啫，工作同我家庭係獨立。」
密密拍戲，與女兒見面的時間少了，難怪家輝最憂慮的是女兒對他感到陌生，他說：「一般都係邊個對得多就親邊個，有次我想抱個女嗰陣佢撥開我，想喊，我好hurt，怕個女大啲對我好陌生，所以會慎重考慮出埠工作時間，甚至安裝視像。」
拒為愛女改戲路
家輝剛拍竣與黃秋生、范冰冰合演的驚慄電影《寄生人》，家輝飾演保險從業員，與冰冰是兩兄妹，擁有雙重性格，實行演技大考驗。
婚後的家輝，雖已當上爸爸，但他強調不會因而影響工作。家輝說：「我絕對唔會因為有小朋友而揀戲拍，主要睇有冇需要，例如色情、咀、粗口等有需要都會做，電影有三級制，我唔會鼓吹屋企人睇我演出，個女夠資格咪可以睇囉。」
採訪：卓寶花 攝影：陳慧安
