香港地生活喺貧窮線以下嘅人雖然話多咗，都其實比上不足比下有餘，因為香港有唔少企業、組織，同埋有心人為佢哋出力，例如恒生同渣打銀行，平時就爭客，最近就爭先做義工。
先係渣打喺上個禮拜，贊助四名員工親自到安徽省阜陽縣，深入當地偏遠地區，將之前「悅讀希望」籌款得嚟嘅2000個「希望背包」，逐家逐戶送到受愛滋病影響嘅小朋友屋企，真係身體力行。
至於恒生銀行，同香港青年協會搞個「恒生銀行國情教育系列」，畀50個14至18歲、家庭經濟欠佳嘅青少年，去北京五日交流及體驗吓，等佢哋多啲了解中國國情，加深內地文化及經濟嘅認識，行程以奧運為主題，包括參觀奧運場館同見吓奧運健兒咁。柯清輝噚日出席喺總行博愛堂舉行嘅首次訓練活動，勉勵學生要擔起香港代表嘅身份，咪失禮香港人。
[email protected]