選舉大局已定，梁家傑大敗，係意料中事，輸咗唔使㷫，下一鋪再嚟。梁家傑醒呀，大大聲話定二○一二年捲土重來，屆時泛民主派冇人同佢爭做特首候選人，因為民主黨李柱銘到時垂垂老矣，其他人無甚氣勢；公民黨仲有余若薇、湯家驊，但佢哋今年唔出，到咗二○一二年唔通同梁家傑內閧咩。至於建制派呢方面，人選就多啲，曾俊華啦，梁振英啦，葉劉淑儀啦，范徐麗泰啦，當然唔少得唐英年司長，都會係人選，反而未受政治與選舉洗禮嘅商界領袖，自由黨人物，未必敢跳出嚟參加競選，不可忘記嘅係一個大前提，去年選委選舉。泛民主派突襲成功，拿到足夠嘅特首候選人提名票數，到咗下次，普選仍未爭取到，再由選委會選舉嘅話，選委選舉戰就會打得好激烈，泛民主派未必贏到一百席㗎。
講選舉動員配票，民建聯工聯會叻過民主派好多。呢日食飯時，居然喺廁所碰到一位民主派議員，拉住佢講選舉後形勢，佢話下次爭選委，唔易打贏，佢話民主派最叻識得洗樓，搵人去投票站投票。但因為支持民主派之人個個思想獨立，唔會受人命令，故此唔係鐵板一塊，全部受指揮嘅。相反，民建聯/工聯會動員力量驚人，除咗洗樓絕不輸蝕畀民主派之外，還有一個絕招，就係可以分時段動員，上午叫一批選民投票畀A，下午叫一批選民投票畀B，到咗黃昏時候，如果計算到A贏梗，B危危乎之時，仲可以發動一輪黃昏投票，叫擁躉全部投畀B，結果AB都贏。民主派識唔識配票呀？識嘅，咪配出一個大頭佛，○四年楊森李柱銘多票得滯，何秀蘭以些微票數飲恨囉。
領教過民建聯/工聯會厲害之後，呢位民主派認為普選其實對親中派/建制派有利無害，佢哋一啲都唔使驚。至於傳聞葉太明年競選立法會議員，在港島出選，議員話：「難啲咯，范太在此，怎能過關！」