港股季結冇驚冇險，前日升267點，昨日只跌番20跌，成交唔見一截，平靜得嚟好穩陣，睇嚟仲有機會試吓20000關。
前晚花旗股市升幾十點收市，對昨日港股氣氛有啲幫助，不是伊朗局勢唔多妥，投資者態度都係小心啲，只吼強勢股短炒。
早排金融市場成日講套息交易，踩低美元，𠵱家油價急升，市場注意力又分散咗啲，不過，如果大家有留意，近日已經有分析員煲緊另一個套息交易嘅概念，就係日本3月結完咗之後，會唔會做番多啲套息交易，咁即係話美元有機會轉強，而又會多番好多錢投入資產市場，咁美股、港股、全球嘅資產市場咪發！千祈唔好諗得咁投入，邊有咁簡單？不過，人哋既然放得風出嚟，短時間要用呢啲藉口做嘢都唔好當佢冇到，市場𠵱家唔明朗因素好多（伯南克都咁話），炒短線策略必須保持靈活，如果唔係隨時都會輸鋪勁嘅。
下禮拜四開始就進入長假期，大家炒輪要特別留意引伸波幅嘅變化，如果唔係見到正股升自己隻C輪升得少甚至唔升，都唔知發生乜嘢事。
中海C輪7868：中海（688）昨收9.82元，股價喺上禮拜升番上50日線樓上，呢個禮拜都喺高位徘徊，想點？好明顯係睇位升破10元關，呢個位阻力唔細，但破咗位就不得了，最少都睇12元至13元，可以諗吓隻中海C輪7868，先買少少，正股升破咗10元再買多啲。
隻輪現價25.5仙，槓桿率3.9倍（有效2.5倍），正股升上12元同13元，7868應該喺40仙同48仙樓上，正股跌穿9.20元止蝕。