昨日講到葉劉淑儀如果明年在港島競選做立法會議員，要睇曾憲梓面色。此語何解？據一位政界人士指點，中央想話搞吓年輕化，勸退吳康民、曾憲梓兩位老人家，吳康民願意退休，但曾人大常委就心懷祖國，忠貞之極，抱死而後已之心為國服務，豈可輕言退休吖。如果曾先生唔退，中央就冇一個好位置提拔范太，以多謝佢十年來坐喺立法會做主席，嚴謹控制議程秩序，管理長毛管得好好。董先生做政協副主席，范太做人大常委，幾好吖。
葉太如果幫吓中央手，勸退曾常委，等范太上京，咁樣葉太就有個好檔位衝上嚟啦。政界人士話：「葉太慳番啖氣好過，曾常委郎心如鐵，冇得講。」路係人行出嚟嘅，長毛都在新界東出線咯，葉太大可發揮拼命三郎本色，○八年喺港島砌過。
政界人士話：「你有所不知矣，新界東人口多，議席多，在比例代表制制度下，長毛攞三四萬票已可穩奪一席，港島區議席少，兼有強勁對手，突圍冇咁易。又譬如黃毓民在九龍西競選嘅話，起碼要十萬票先至可以穩操勝券，你估話咁易呀，要知道馮檢基、涂謹申、劉千石、曾鈺成四位並非易與之輩，想搶佢哋個位，好難㗎。」
或者唔怕呢，劉千石可能因為做議員太耐，已有意興闌珊嘅感覺，會退選都唔定，曾鈺成又話會入閣，取李國章之位而代之，九龍西又多一個空缺，只係怕以民建聯嘅動員力量，搵位新人上場都可以保送上壘，令毓民無機可乘。
特首選舉後，各政黨政團開始諗爭取普選，但知道二○一二雙普選只係口號，中央唔會係「順德人」咁易OK，爭即管爭，如果曾特首得中央批准2016，收唔收貨呢？○八年十月嘅立法會有排辯論，入唔到立法會就冇發言權，故此要爭取雙普選，就要先爭取明年立法會，假如保守派大勝，雙普選方案放入雪櫃可也。