同中海油好似過唔去嘅金融長毛DavidWebb，上個禮拜一又再呼籲中海油小股東今日投反對票，否決公司同大股東中海油集團旗下中海石油財務嘅3年關連交易，佢認為呢單嘢等於中海油借錢畀中海油集團，對小股東唔公道，身兼中海油集團總經理及中海油董事長嘅傅成玉噚日回應話，查實呢個安排對小股東有好處，點解呢？
傅成玉話，原因係中海油當日交啲商業滙票畀中海石油財務，後者就即日科水畀中海油，若然將呢啲商業滙票拎去銀行，就要45日至收到錢，而且收嘅服務費低過銀行，至於存放喺佢哋處嘅錢，只佔公司總存款10.5%，利率同放喺銀行一樣，標普同穆廸畀財務公司嘅評級，甚至高過內地唔少銀行，風險好細，佢身兼財務公司嘅董事長，會幫手昅實，大家放心喎，至於中海油小股東究竟聽邊個講，就要睇吓今日投票結果喇。
[email protected]