亞視小花吳亭欣（Lulu）早排同陳道然（蘭子）爭仔，男主角係希慎集團後人利承武，即係蘭子𠵱家男朋友，吳亭欣做咗愛情輸家，但之後好快有新歡，係專做音響產品嘅標華豐集團太子爺張宏基（Wayne）。
陳鍵鋒暗踩官恩娜
前晚吳亭欣同陳鍵鋒、王賢誌等喺銅鑼灣睇新片《太陽倒數》首映，講到蘭子同利承武，吳亭欣依然好激氣咁款，起初佢同利承武劃清界線，俾人話佢輸畀蘭子，吳亭欣話：「話咗唔關我事，真相大白啦，我一身輕晒。呢啲嘢邊有輸唔輸，又唔係打仗，唔係比賽，係冇贏冇輸，我自己感情生活好開心。」問佢拍拖拍成點？佢好尷尬咁話：「總之開心，唔錯。」
問吳亭欣同利承武仲有冇聯絡，佢話：「唔識啲做生意人呀，冇聯絡。」再見不是朋友？吳亭欣話：「我怕惹麻煩呀，人哋鍾意宣傳，冇必要介入人哋度。」問佢係咪朋友都冇得做？吳亭欣決絕咁話：「短期內啦，風頭火勢唔方便聯絡呀。」
另外，官恩娜最近拍《律政新人王2》俾人話成日遲大到，有份拍嘅陳鍵鋒前晚笑住吞吞吐吐咁話：「呀……都冇嘅。」佢話可能歌手未習慣拍劇生活，仲話：「啱啱拍完一場法庭戲，佢有兩頁紙對白竟然講得晒，我哋都為佢鼓掌呀。」
