上個禮拜國際賽檔期，各大聯賽休息咗一周，我同牛兄喺呢段日子一啲都冇偷懶，照舊搵咗「紅黑盤王」畀波友參考。先多謝牛兄撐我比勒費爾德，同佢商量過之後，桑坦德呢個「西甲紅盤王」喺周日主場對畢爾包，值得追多鋪。
桑坦德呢期喺西甲絕對係風頭躉，近10場淨係輸過俾巴塞隆拿，上場仲作客淨贏華倫2:0。睇番場波嘅精華片段，兩個箭頭施積同梅里廸斯合拍到無倫，第1球就係靠施積頭鎚二傳後者再車身射入。
鋒線有力默契佳
再講，塞爾維亞長人施積喺上周六歐國外對哈薩克都省入1粒，狀態唔錯；最重要係佢喺嗰場攞紅牌，周三和葡萄牙1:1場波要停賽唔使踢，體力肯定夠晒。
畢爾包𠵱家排緊尾3，唔講唔知，原來佢哋同巴塞、皇馬一樣未試過降班，不過有傳西班牙嗰邊吹到畢爾包今季係咁先，係時候落乙組踢波喎。雖然畢爾包近4季作客桑坦德全贏，但我畢傑就最鐘意玩拗頸，信近期走勢多過往績。我同牛兄買咗桑坦德早飛喇，你今日買咗未？
文：畢傑