有「香港畢菲特」之稱嘅恒基地產主席四叔李兆基前排極力推薦同鄉創辦嘅碧桂園，講明話會攞10億出嚟抽呢隻新股。咁啱，嘉華國際噚日搞業績記招，華華梗係要問吓主席呂志和，會唔會湊熱鬧，都攞啲錢出嚟抽埋一份？
點知呂志和笑咪咪話：「要買碧桂園，不如買嘉華，我哋重好過佢」。
嘉華國際噚日市值只係得67億，但碧桂園淨係集資嗰份都過百億啦，咁睇斷估呂志和唔係用市值做比較，或者係講樓盤發展潛力都未定，佢噚日爆料，話未來兩年會攞100億出嚟買地，始乎真係有心大展拳腳。
世叔伯意見要尊重
講真，呂志和𠵱家喺澳門搞緊真正嘅賭場，要同一班美國拉斯維加斯賭場老手同埋賭王何鴻燊爭天下，又點會志在香港股市呢個賭場呢。呂志和自己都話唔係咁鍾意玩股票，但係「世叔伯（指四叔）嘅意見梗要尊重啦。」真係一個可愛嘅老人家。
[email protected]