陶大宇前日坦承與太太黃慧寶（阿寶）離婚，阿寶則直指郭羨妮是破壞其婚姻的第三者。昨日郭羨妮連踩兩場公開活動，全程風騷帶笑的她回應緋聞時，自爆接獲陶大宇來電慰問，又不否定與大宇有發展可能，更揚言會「畀心機搵男朋友」，看來大宇不但可回味她的甜吻，還可回味伊人的「金句」。
陶大宇和太太黃慧寶前日直認結束七年婚姻，盛傳與大宇合演劇集《學警出更》一啜定情的郭羨妮，更被阿寶指為第三者。昨日郭羨妮連踩兩場活動明顯有備而戰，全程笑容滿面，表現風騷。
自製激吻
臨場要求加插咀戲
郭羨妮中午約12時先到新太陽廣場出席復活節活動，活動結束後，她即向在場近半百傳媒自爆接獲大宇來電，她帶笑說：「今日到我回應啦，第一樣我要否認係第三者，呢件事與我無關。第二樣，我都係噚日朝早先知發生件咁嘅事，係陶大宇打電話同我講對唔住，佢話係自己離婚，同我講唔好意思，連累我。」對於阿寶直指郭羨妮為第三者，她居然說：「我有問過佢（大宇），點解佢太太咁講，佢淨係話對唔住。」有記者問她是否覺得自己也是受害者時，她竟說：「可以咁講。」
郭羨妮和大宇在《學》劇中飾演夫妻，傳因一幕激咀戲撻着，據知劇本原來並無接吻戲，是大宇和郭羨妮臨場主動要求加插激吻場面，監製黃偉聲昨日接受記者電話查詢時直認說：「係佢哋主動要求嘅，嗰場戲講佢哋冰釋前嫌，本來劇本叫佢哋擁抱，但大宇、郭羨妮同導演都覺得加埋咀戲會好啲。」
可是郭羨妮對拍攝激咀戲有另一說法，她說：「係劇情需要，好多要擁抱嘅鏡頭都cut咗，我身為演員，係做番套劇嘅要求，唔可以唔做。」對於大宇曾表示回味與她拍咀戲的感覺，她說：「佢講嘅係以前同關之琳拍錫戲，留番感覺回味，嗰個並唔係我，傳媒寫錯晒，激死我啦。」
有傳拍攝《學》劇時，郭羨妮因愛犬去世令大宇對她由憐生愛，對此她說：「套劇嘅台前幕後都有安慰我，佢（大宇）亦有份安慰我。」但她是否將來與大宇有發展可能，她說：「呢啲時間唔好講呢啲嘢，人哋離婚，佢單身與我無關。」
有消息指大宇開工時對她管接管送，郭羨妮說：「佢冇接我亦都冇送我，冇咁嘅事。」又指感受不到大宇有意追求，也不會評論對方離婚一事，她說：「拍劇後大家冇聯絡，拍攝期間有同大宇交換電話，但只限於工作聯絡，唔知點解𠵱家會關我事，我要澄清自己同呢件事絕對無關。」但她承認擔心形象受損：「唔多唔少有影響，呢啲事唔係第一次發生喺我身上。」
高層訓話
「影響觀眾心中形象」
其後郭羨妮前往尖沙嘴出席「壹電視大獎2007頒獎典禮」，無綫高層陳志雲和樂易玲也有到場，其間陳志雲說：「身為公眾人物要有公眾形象，就算唔係事實都要盡量避免，因為會影響觀眾心目中形象。」
樂易玲更自爆已接獲郭羨妮電話，她說：「今朝佢主動打畀我，佢話『我真係冇做過，唔關我事』。我都信佢，我唔覺佢身邊有一個關心佢嘅人，唔覺佢有拍拖。」她又稱不會雪藏郭羨妮。至於郭羨妮則再次重申無辜，問她有否想過如何挽救負面形象？她說：「我乜嘢都冇做過，點解要挽救形象？唔通要社會服務令呀？講笑啫。我會畀心機做嘢，畀心機搵個男朋友。」
採訪：卓美娟、張俊銘
攝影：陳順禎、娛樂突發組
