時間
95年
地點
無綫清水灣電視城
人物
吳剛
經過
一提起《歡樂滿東華》，自不然會諗起吳剛師傅搽油食炭飲滾油嘅亡命表演，不過吳剛唔單只耍功夫叻，佢耍太極仲叻！
吳剛91年開始為《東華》演出，第一年食炭，第二年飲滾油，難度一年比一年高，而吳剛嘅江湖地位都不斷提升。不過，95年2月，有個女聽眾打電話去電台訴心聲，話同一個電視台男藝員結婚12年，有個12歲嘅女，由於老公緊張事業，一直唔肯公開婚姻狀況，搞到個女唔能夠好似其他小朋友咁，同父母行街享天倫之樂。呢名女子仲話近幾年老公因為要練功，唔肯同佢行房，明顯係講緊當時人氣甚盛嘅吳剛。
結婚12年才認妻女
消息傳出之後，吳剛每次見到記者都大耍太極唔肯回應，直至同年9月，佢喺無綫舊清水灣電視城錄影節目嗰陣，先至鼓起勇氣承認自己有女有老婆，但問到係咪因為練功唔肯行房，佢就繼續耍太極唔肯答。呢件事令吳剛嘅正氣形象蕩然無存，連帶人氣都跌落谷底，仲慘過俾人踢爆佢食炭飲滾油係掩人耳目嘅伎倆。
之後吳剛斷斷續續為《東華》表演，直至01年《東華》之後佢已經被out出局。雖然03年吳剛曾經自薦喺《東華》表演捉鱷魚，可惜又被無綫否決。
本欄逢周一至周六刊出
