政府早就呼籲市民「吸煙危害健康」，自從今年1月1日起，大部份室內地方已列入禁煙範圍，可見政府決心相當大！但有國產手機商乘人之危，煙民努力「洗底」嗰陣，佢竟唱反調推出一部香煙王手機，表面上淨係抄外形咁簡單，實情內有亁坤，原來機蓋裏面可放入8支煙仔，搞到本來想戒煙嘅市民，呃倒人卻呃唔倒自己，睇見鼻涕口水一齊嚟；盒內仲附送打火機，間接助長吸煙。當普通手機玩吓無所謂，若然收埋煙仔呃女友扮戒煙，小心斷正！
記者：陳國輝
攝影：楊錦文
Model：Edmond、Wing
對住佢，點會戒得甩？
功能一般 創意搭夠
「喂，佢只不過係一款好普通，配備鏡頭兼有插卡嘅手機，有乜特別先？」你咁諗，絕對正確，皆因香煙王3838單靠創意呢招，成為近期最Hot國產機話題。老實講，售價千零蚊，有邊個會認真留意分唇呢？相比同級大陸機，香煙王輸到貼地，俾人打都無得還手嗰隻，但只要見真身，便眼前一亮，仲發現大陸人才走去生產老翻機，實在可惜。要拎出嚟令人留意、博出位，佢絕對做得到；但手機以香煙做Theme，題材太敏感，跟盒送8支煙仔，如果由未夠18歲嘅學生哥買咗，係咪算觸犯法例先？
按鍵太實 㩒到手指痛
好睇，但唔好用，係個人對香煙王嘅一點玩後感。佢簡單到像Low-end機般，按鍵方正、設計四平八穩，無錯，有時唔花巧係好，但用落發現啲掣要出晒力去㩒先有反應，已經好嚇人；機側仲有個USB插槽，由膠蓋遮住，小記嘗試撬開佢嚟影相，點知費盡九牛二虎之力，都唔及得女人用尖而長嘅指甲一「挑」咁簡單，擺明係Detail位設計得唔靚；再講，功能點多都好，機身連一個快捷鍵都無，每次要逐項功能慢慢揀，好浪費時間。用嚟裝飾唔成問題，但操作唔User-friendly，判得死罪。
咪受誤導 相機得VGA級
買香煙王為咗貪造型過癮、博出位，恭喜你，佢一定滿足到呢方面要求；若然想影幅靚相，然後再沖晒收藏，勸你唔好嘥呢啲錢。彩芒尺寸勁細，自稱採用OLED技術，但肉眼睇頗為暗淡，唔算光，最奇怪係Menu明明寫住有130萬像素相機，到親身試用先發現實際最高為640×480解像度，亦即30萬像素；據Sales講，近期好多大陸機都聲稱具備130萬甚至200萬像素鏡頭，但真正用落先俾人踢爆原來得VGA級數……各位準備買大陸機嘅話，記得事前問多句、試清楚啲分唇。
搞笑！說明書教人辨別真偽
一般國內「高手」為避開法律責任，外形唔會跟得好足，呢部機身上印住大大隻「中華」牌子嘅香煙王，當然唔係正版。最搞笑係，盒裏面有張宣傳海報，竟大條道理教人分辨真偽，仲列出幾項與正版唔同之處，幫自己解畫，洗脫嫌疑，最後仲叫買家放心去用，認真服咗佢！
PROFILE
制式：GSM雙頻
體積：92×56×24mm
重量：72g
主要功能：插T-Flash記憶卡、30萬像素相機、內置兩款遊戲、音樂播放器、拍攝短片
數碼動力（23914988）